Siglir tar il cuntegn

Header

cuntegn

Cussegl dals chantuns Debits da corona duain vegnir amortisads senza tutgar reservas

Ils debits chaschunads dal sustegn da la Confederaziun durant la pandemia ston vegnir pajads. Il Cussegl dals chantuns ha refusà ils plans dal Cussegl naziunal da duvrar reservas ord onns passads.

Il Cussegl naziunal ha vulì truschar cun la palutta gronda. La mesadad d'avanzaments dals onns passads, 10,5 milliardas francs, vuleva el duvrar per amortisar ils debits. A quella proposta n'è nagin dal Cussegl dals chantuns suandà: cun 38 vuschs e nagina cuntravusch è el d'accord cun il Cussegl federal, e na vul betg duvrar ils avanzaments.

Tutgar las reservas saja memia privulus

Fin 2035 duain ils debits vegnir amortisads ord ils avanzaments dal budget regular da la Confederaziun. Er distribuziuns supplementaras da la banca naziunala duain vegnir duvradas per amortisar ils debits. Silmain per quest onn n'è quai betg da spetgar perquai che la banca naziunala ha quest onn in grond minus.

Minister da finanzas Ueli Maurer ha avertì ch'i spetgian temps economicamain difficils. Tutgar las reservas veglia dir da betg sa tegnair vid il frain da debits, vul dir ch'ins na va betg sur in tschert cunfin da debits. Avant curt ha la Confederaziun pledà 10 milliardas francs per il fond da salvament per las interpresas d'energia.

Cun il Na dal Cussegl dals chantuns va la lescha davart las finanzas enavos en il Cussegl naziunal. La lescha sto vegnir midada, perquai ch'ella cumonda a la Confederaziun d'amortisar ils debits da la pandemia entaifer 6 onns.

audio
RTR novitads da las 12:00
ord RTR Audio dals 14.09.2022.
laschar ir. Durada: 4 minutas 52 Secundas.

RTR novitads 12:00

Artitgels legids il pli savens