Siglir tar il cuntegn

Header

cuntegn

Fin 10 milliardas francs Cussegl Naziunal approva agid finanzial per concerns d'energia

Suenter il Cussegl dals chantuns ha er il Cussegl naziunal ditg Gea da midar l'ordinaziun d'urgenza dal Cussegl federal en ina lescha d'urgenza. Il Cussegl federal aveva activà in fond d'urgenza ils 6 da settember suenter ina dumonda d'agid da l'Axpo ch'era curt avant vegnir en stretgas da liquiditad.

Fond gia activà dal Cussegl Federal

Il fond da salvament vegn ad avair ina grondezza da fin 10 milliardas francs. Profitar da quel pon firmas d'energia ch'èn relevantas per il sistem. En cas da svilups nunspetgads sin il martgà d'energia che chaschunan problems finanzials pon quellas dumandar per in emprest da daners tar la Confederaziun.

Il Cussegl Federal aveva activà il fond da salvament avant in'emnia cun ina ordinaziun d'urgenza suenter che l'Axpo aveva dumandà per agid. La regenza ha mess a disposiziun fin 4 milliardas francs per quella. La delegaziun da finanzas dad omaduas chombras ha dà liber questa summa. Fin ussa n'ha l'Axpo betg duvrà quest agid finanzial.

In'ordinaziun d'urgenza vala, fin che la basa legala urgenta per il fond d'urgenza entra en vigur. Quai è ussa il cas. Cun il Gea dal parlament vegn l'ordinaziun d'urgenza midada en ina lescha d'urgenza. Quella po ir en vigur a partir dal prim d'october. Avant l'entir Cussegl naziunal aveva la Cumissiun per ambient, planisaziun dal territori ed energia da Cussegl Naziunal (Urek-N) approvà la proposta dal Cussegl federal cun 18 a 7 vuschs.

Be PPS cunter la proposta

Il Cussegl dals chantuns aveva gia ditg Gea per credist urgents il zercladur. Il Cussegl naziunal ha ussa approvà il fond da salvament cun 136 cunter 51 vuschs (8 abstenziuns). Tut las vuschs cunter eran da la PPS. Ils 55 cussegliers e cusseglieras naziunalas da la partida avevan pretais ils 9 da settember ina sessiun extraordinaria davart il credit da milliardas en connex cun il fond d'urgenza. Quella ha lieu durant la terz’emna da la sessiun. Tut las autras fracziuns han approvà il fond, ellas han tuttas suttastritgà l'impurtanza da la segirezza da provediment.

audio
Per tadlar: curt e cumpact
ord RTR Audio dals 13.09.2022.
laschar ir. Durada: 51 Secundas.


RTR novitads 15:00

Artitgels legids il pli savens

Scrollar a sanestra Scrollar a dretga