Il Cussegl dals chantuns vul regular pli fitg il tractament da products da tubac. El ha deliberà ina lescha che prevesa ulteriurs scumonds da reclama per cigarettas en la pressa e l'internet. Plinavant na dastgian nagins products da tubac pli vegnir vendids a minorens.
Tenor il Cussegl dals chantuns na duai betg pli esser lubì da regalar musters gratuits da products da tabac. Plinavant duai il sponsoring da occurenzas internaziunalas entras l'industria da tubac vegnir scumandà. El ha approvà ina midada da lescha cun 32 cunter 3 vuschs, tar 5 abstenziuns.
Lex Philip Morris
Concret vul la chombra pitschna scriver en la lescha che da occurrenzas organisadas entras la Confederaziun, chantuns e vischnancas na dastgian betg pli acceptar in sponsoring entras l'industria da tubac. Pir da curt era Ignazio Cassis vegnì crititgà, pervia ch'in producent da cigarettas era previs sco sponsur per il pavigliun svizzer a l'EXPO 2020.
Il Cussegl dals chantuns va cun questa decisiun pli lunsch che la lescha actuala ed il Cussegl federal. Ozendi è sulettamain scumandà reclama en radio e televisiun. Plinavant èsi scumandà da far reclama per products che sa drizzan en spezial envers giuvenils.
Sco proxim sa fatschenta il Cussegl naziunal cun las midadas en la lescha.
RR novitads 17:00