La pretensiun da l'iniziativa è atgnamain clera: Mintga furma da reclama per products da tubac che cuntanscha uffants e giuvenils è scumandada.
Il Cussegl federal prevesa en sia proposta per la revisiun da la lescha da tubac perquai tranter auter che reclamas en gasettas e revistas èn scumandadas. E quai betg mo sco gia ussa en quellas che sa drizzan ad uffants e giuvenils, mabain en tut ils products da pressa.
Per la maioritad da la cumissiun dal Cussegl dals chantuns va quai memia lunsch. Ella vul vinavant lubir reclama per products da tubac sin las paginas endadens las revistas ed las gasettas sch'ils abunents da quellas èn per la plipart persunas creschidas.
Il Cussegl dals chantuns ha suandà a la cumissiun dal Cussegl dals chantuns. Excepziuns dat quai dentant sche las gasettas u revistas sajan principalmain per il martgà ester u sulettamain per las persunas che lavuran en la branscha da tubac. La fatschenta va uss vinavant en il Cussegl naziunal.
Concessiuns als concerns da tubac
Insumma betg cuntenta cun quella excepziun è la cussegliera dals chantuns Maya Graf da la Partida verda da Basilea-Champagna.
La lobby da tubac emprova da chattar dapertut largias. Igl è deplorabel che la maioritad da la cumissiun dat a l’industria da tubac dapli paisa che a la protecziun da noss uffants e giuvenils dal consum da tubac.
Il text da l'iniziativa ed era l'opiniun da las votantas e dals votants saja clers. Uffants e giuvenils na dastgan betg vegnir en contact cun reclama per cigarettas ed auters products da tubac. La proposta da la cumissiun ussa sin maisa n’adempleschia quai betg.
Betg dapli che l'iniziativa pretenda
Gist da l'opiniun cuntraria è il cusseglier dals chantuns grischun Martin Schmid da la PLD. Cler ch'i valia da realisar l'iniziativa, dapli dentant betg.
La cumissiun ha fatg buna lavur, na va betg la via dal scumond total da reclama che dess suenter ina limitaziun totala. Là nua ch’i va per la part da l’iniziativa è ins plainamain persuenter da realisar quai, dentant betg dad ir pli lunsch.
Il Cussegl federal haja qua surfatg ed haja preschentà ina sort scumond da reclama general per tubac. Gist quai na pretendia l'iniziativa dentant betg. I saja perquai impurtant da far frunt a quella scumonditis che pericliteschia adina pli fitg la libertad individuala, di el.
Tar il zutger, ils auters dian ch’ins duai mangiar pli pauca charn, auters dian che era ils meds da transport possian esser in privel. Ins pudess era numnar l’ir cun skis. Sch’ins resguarda tut ils temas cun in tschert risico per la sanadad dessi bleras restricziuns.
Mo quai haja nagut da far cun la chaussa, respunda Maya Graf. I giaja qua betg per in scumond da fimar ni consumar tubac, mabain per proteger uffants ed giuvenils da la reclama per in product evidentamain nuschaivel.
Las medias ed ils medis svizzers han qua era in maini cler ed sustegnan ina interpretaziun severa dal scumond da reclama da tubac per uffants ed giuvenils perquai ch’i pon demussar che persunas minorennas che cumenzan a fimar na vegnan praticamain betg pli liber dal tubac. E quai chaschuna gronds donns per la sanadad.
Tge scumonds dovri, tge duai vinavant esser lubì? Las gruppas d'interess èn dad omaduas varts pulit fermas. La debatta el Cussegl dals chantuns damaun vegn a dar ina emprima impressiun en tge direcziun ch'i pudess ir.
