Ils proxims onns èn pendentas pliras renovaziuns vi dals implants per transportar ils autos tras ils tunnels dal Lötschberg, Furka e Vereina. Perquai ch'ils implants èn impurtants per cuntanscher las regiuns e gidan d'evitar viadis sur ils pass, vul il Cussegl federal sustegnair a mantegnair quels. En tut duain 100 milliuns francs star a disposiziun.
40 milliuns francs dapli
L'infrastructura da la viafier e da las vias duai vinavant vegnir finanziada da la Confederaziun. Per ulteriuras investiziuns en l'infrastructura da las vias duai il credit da 60 milliuns – ch'il parlament aveva decidì il 2018 – vegnir augmentà per ulteriurs 40 milliuns francs. Ultra da quai propona il Cussegl federal ch'il material rudlant per ils trens d'autos na duai betg pli vegnir finanzià directamain da la Confederaziun.
Questas propostas van uss en consultaziun, uschia che partidas ed organisaziuns pon pigliar posiziun tar la proposta da metter a disposiziun dapli daners.
Nagins daners per Alpsu e Simplon
Il tren d'autos sur il pass Alpsu vegn – sco decis il 2021 – stritgà l'onn 2023. Quai pervi da la dumonda bassa ed ils auts custs. Là exista durant l'entir onn ina colliaziun alternativa cun il pass dal Lucmagn. Ultra da quai vegn la purschida da trens extendida a l'Alpsu.
Il tren d'autos tras il Simplon finanziescha vinavant il chantun Vallais.
