Suenter la chombra pitschna ha er la chombra gronda refusà il nov model dal Cussegl federal per dismetter il chasti da maridar. Il Cussegl naziunal suonda uschia a sia cumissiun d'economia. Lezza ha crititgà che la proposta na satisfetschia betg las differentas furmas da vita e famiglia, perquai che la nova proposta chastia pèrs da concubinat.
Maurer: «Nus pudessan schliar il problem»
«Nus stoppian ina giada schliar il problem ch'i dettia glieud che paja memia bler taglia. Quai pudessan nus far», ha appellà il minister da finanzas Ueli Maurer. Las ulteriuras dumondas da la politica sociala possian lura vegnir schliadas en in proxim pass. Las realitads sociopoliticas vegnan giuditgadas a moda differenta. La mesadad dal cussegl sa tegnia vid il maletg da famiglia tradiziunal.
Tenor ils plans dal Cussegl federal chaschunass la refurma radund 1,5 milliardas francs damain entradas, da quai 1,2 milliardas tar la Confederaziun.
Dapi onns s'occupescha la politica cun il chasti da maridar. Il 2016 ha il suveran refusà stgarsamain in'iniziativa dal pievel da la PCD per abolir il chasti. Perquai che la Confederaziun aveva preschentà cifras faussas ha il Tribunal federal decis che la votaziun na saja betg valaivla.
Sche l'iniziativa na vegn betg retratga, sto la votaziun vegnir repetida. Sche la PCD fa quai dependa dal parlament.
RTR novitads 14:00
