Siglir tar il cuntegn

Header

cuntegn

Cussegl federal Grond credit per colliar sistems da sanadad a moda digitala

Il sistem da sanadad saja fitg bun en Svizra. Tge che pertutga la digitalisaziun, saja quel dentant in dals pli pauc sviluppads, di la directura da l'Uffizi federal da sanadad Anne Lévy.

Perquai dumonda il Cussegl federal dal parlament svizzer 392 milliuns francs per 10 onns. Quels daners vul el duvrar per il program Digisanté per digitalisar e contribuir a la segirtad da pazientas e pazients.

Parter infurmaziuns

Ils acturs da sanadad hajan tenor Lévy mintgamai lur agens sistems. La finamira saja ch'i na saja betg pli necessari da nudar las medemas infurmaziuns pliras giadas, e ch'ils sistems partan infurmaziuns tranter in l'auter. Quai pertutga datas da tractaments, persunas ed process administrativs.

L'emprima fasa dal program è da far pussaivel ch'ils sistems possian parter datas tranter in l'auter. En in segund pass dovria ina infrastructura naziunala per parter las datas a moda segira. Quai pertutga tranter auter il sistem d'annunziar malsognas transmissiblas, ed datas davart ospitalisaziuns staziunaras.

A la fin duain ils acturs en il sistem da sanadad pudair nizzegiar il sistem per planisar e sviluppar meglier il sistem. Anne Lévy numna l'exempel d'in test positiv da corona. La finamira saja, che la cassa da malsauns survegnia automaticamain il quint, ed il test vegnia nudà en il dossier electronic da pazients.

Silsuenter duain las datas er esser a disposiziun a l'Uffizi federal da sanadad e l'Uffizi federal da statistica, per studis scientifics.

audio
Per tadlar: curt e cumpact
ord RTR Audio dals 23.11.2023.
laschar ir. Durada: 1 minuta 19 Secundas.

RTR novitads 12:00

Artitgels legids il pli savens