Siglir tar il cuntegn

Header

video
Alain Berset cun in ulteriur appel da laschar vaccinar
Or da News-Clip dals 13.10.2021.
laschar ir
cuntegn

Cussegl federal ha decis Nagin bon da 50 francs – ma offensiva da vaccinar

La Svizra è memia plauna cun vaccinar. Sulettamain 71,2% da las persunas sur 18 onns sajan vaccinadas cumplettamain. Tenor il stadi d'enconuschientscha stuessan 93% da las persunas sur 65 onns e 80% da las persunas tranter 18-65 onns esser vaccinads per ch'ins possia abolir las mesiras actualas.

Il Cussegl federal è er vinavant da l'avis che la vaccinaziun è la meglra pussibilitad ord la crisa. Pervia da quai ha el decidì il suandant:

    • Ina emna naziunala da vaccinar dals 8 fin ils 14 da november
    • Dapli posts d’infurmaziun e vaccinaziuns mobilas
    • Schlargiar la purschida da s'infurmar individualmain
    • Nagin bon da 50 francs per persunas che persvadan auters da sa laschar vaccinar
audio
Offensiva da vaccinar, dentant nagins bons da 50 francs
03:25 min, Actualitad dals 13.10.2021.
laschar ir. Durada: 03:25 minutas.

Emna naziunala da vaccinar, ils 8 fin 14 da november

Ina campagna da medias naziunala ed occurenzas localas da chantuns e vischnancas duain informar la populaziun davart avantatgs da la vaccinaziun. Ils fatgs pertutgant segirtad, efficacitad, ed effects secundars duain vegnir preschentads a moda chapaivla ed en pliras linguas. Era il risico d'ina infecziun e las pussaivladads da sa laschar vaccinar duain esser part da questa campagna.

Il Cussegl federal vegn a sa drizzar cun ina brev a la populaziun per accentuar l'impurtanza da sa laschar vaccinar. Ils custs per quest'emna da maximalmain 15,2 milliuns francs surprenda la Confederaziun.

Posts mobils da vaccinar e s'infurmar

Per il mument datti radund 50 posts mobils per sa laschar vaccinar. La Confederaziun vul dar la pussaivladad ad uschè bleras persunas sco pussaivel da sdar la squitta senza grondas stentas. Ella surpiglia fin 220'000 francs per mintg'ulteriur post mobil da vaccinar e cussegliar, maximalmain 38 milliuns francs.

Infurmaziuns individualas

Persunas ch'èn anc indecisas pertutgant la vaccinaziun duain pudair s'infurmar individualmain. Las cussegliaziuns pon esser persunalas, per telefon u per chat en las raits socialas. Ils cussegliaders e las cussegliadras gidan da chattar in center da vaccinaziun, ina media u era in translatur. Ils chantuns pon engaschar cussegliaders e cussegliadras u era incumbensar organisaziuns sco la Spitex. La Confederaziun surpiglia era quels custs. Previs èn 43 milliuns francs.

Investiziuns da maximalmain 96,2 milliuns

Quels custs sajan persistents, cumpareglià cun ils custs da 50 milliuns mintg'emna per tests gratuits. In tempo aut da vaccinar haja ulteriurs effects positivs economics e per la politica da sanadad. En media possian ins evitar in'ospitalisaziun per 100 vaccinaziuns e per 250 vaccinaziuns in cas sin la staziun intensiva.

Directurs cantunals da sanadad cuntents

Desister da bons per motivar persunas da sa laschar vaccinar è consequent, tenor directuras e directurs chantunals da sanadad. Remuneraziuns sajan in signal fallà. L'offensiva da vaccinar cunvegna a la gronda part dals chantuns, en vist'a la bassa rata da vaccinaziun. La Conferenza da directuras e directurs chantunals da sanadad fa dentant attent a la mancanza da persunal dal fatg en connex cun la purschida d'infurmaziun individuala. Là dovria il sustegn da las organisaziuns.

RTR novitads 16:00

Artitgels legids il pli savens

Scrollar a sanestra Scrollar a dretga