Il Cussegl federal metta en dumonda il scumond da construir novas ovras atomaras. El reagescha uschia sin l'uschenumnada «iniziativa da blackout». Quella pretenda ch'il scumond vegn abolì. Quella era reussida il mars da quest onn.
In scumond general per novas ovras saja cunter l'avertadad envers tecnologia. Quai ha ditg il minister d'energia, Albert Rösti, la mesemna avant las medias a Berna. Il Cussegl federal parta l'opiniun dal comité d'iniziativa ch'i na duessi betg dar in «scumond da tecnologias». El è da principi avert quai che pertutga ovras atomaras.
Tema: Betg avunda energia regenerabla
Plinavant na saja betg cler, sche las energias regenerablas vegnan fabritgadas or svelt avunda per cumpensar ovras atomaras che ston vegnir serradas giu. Il diver d'energia creschia plitost, perquai dettia qua anc dumondas avertas.
Sch'igl n'è betg pussibel da cuvrir il basegn d'energia cun energia regenerabla – quai sa mussa gea pir ils proxims diesch onns – vegn uschia avert in'ulteriura opziun.
Concret vul il Cussegl federal lavurar or ina cuntraproposta indirecta a l'iniziativa da blackout. La cuntraproposta duai vegnir elavurada fin la fin da l'onn. L'iniziativa da blackout refusa il Cussegl federal. El manegia che da lubir puspè novas ovras atomaras bastia sin nivel da lescha. In Gea a l'iniziativa fixass quai perencunter en la constituziun. Plinavant na vul il Cussegl federal betg che be la Confederaziun duai esser respunsabel per il provediment, sco quai che l'iniziativa pretenda. Ils chantuns, vischnancas e firmas duain mantgnair lur cumpetenzas.
Adattà al tema
Tge mesiras dovri a lunga vista per avair avunda forza electrica en Svizra? Davart quai han discuttà Magdalena Martullo-Blocher, Martin Schmid e Jon Pult en in «Controvers» avant dus onns.
