La situaziun pertutgant l'enviern saja tendida, ha communitgà il Cussegl federal. Perquai ha el decis mesiras concretas en cas che la forza electrica vegnia stgarsa. Sch'igl avess da dar ina mancanza da forza electrica lura reduciss il traffic public pass per pass sia purschida. Vul dir trens pli curts e pli paucs ed era damain trens da rauba. Enstagl da bus electrics duessan lura era cursar dapli bus cun diesel.
Cumpareglià cun l'onn passà saja la situaziun dentant main seriusa. Perquai sa fatschenta il Cussegl federal era gia ussa cun las reservas da gas per l'enviern 2024/2025 perquai che questas capacitads vegnian gia vendidas ussa.
