Ils implants electrics da reserva ch'il Cussegl federal planisescha n'èn probabel gnanc necessaris. A questa conclusiun vegnan studis da la Scol'auta turitgaisa per scienzas applitgadas (ZHAW). Tenor l'analisa pudess la Svizra segirar ses provediment d’electricitad er senza l’installaziun d’ovras electricas fossilas. Perquai stoppia dentant vegnir garantì in spazi d’emplenida minimal en ils lais da fermada da la Svizra.
Sch’in tal livel minimal d’emplenida saja garantì, na vegnissan las ovras fossilas da reserva betg pli duvradas, ha ditg Jürg Rohrer, professer per energias regenerablas a la ZHAW, en ina communicaziun da la scol'auta.
Uschia na fissi absolutamain betg chapaivel, sche la Svizra procurass anc per ulteriuras ovras fossilas da reserva.
Questa conclusiun sa basa sin in’analisa da plirs studis davart la segirezza dal provediment d’electricitad en Svizra. Ils implants planisads che vegnissan fatgs ir cun carburants fossils na vegnissan betg pir duvrads en cas d'urgenza. Gia sch'i smanatschass in tal cas producissan quels forza electrica per betg duvrar l'aua da las ovras idraulicas en las alps.
Ma i dess er autras mesiras per schanegiar las ovras idraulicas. Per exempel cun spargnar durant l'enviern 5% energia ed extender las energias regenerablas ed importar dapli forza electrica.
