Siglir tar il cuntegn

Header

audio
Energia en Grischun: Stan actual e mancanza pussaivla
Or da Actualitad dals 21.01.2023. Maletg: Keystone
laschar ir. Durada: 3 minutas 21 Secundas.
cuntegn

Mancanza d’energia Il chantun vul mantegnair sia strategia da spargn

Malgrà ina prognosa optimistica da la cumissiun per l’electricitad davart la mancanza d’energia vul il chantun Grischun mantegnair sia strategia da spargn.

Ils lais da serra svizzers e las reservas da gas europeic èn sin in bun livel. Ed er la forza atomara da la Frantscha è suenter revisiuns puspè disponibla. Tuttina sajan ins anc en ina situaziun tendida, di Thomas Schmid, il manader da l’Uffizi d’energia e da traffic dal Grischun.

Las reservas da gas bastan be per in quart dal basegn annual e cun las ovras atomaras avain nus fatg quint pli baud.
Autur: Thomas Schmid manader da l'Uffizi d’energia e da traffic dal Grischun

Las reservas sajan grazia a l’aura miaivla uschè bunas e tanschian be per ina part dal basegn d’energia. L’enviern saja plinavant anc lung e tut tenor tge che l’aura fetschia possia anc capitar bler. Il chantun vul restar tar la strategia oriunda.

In concept cun trais fasas

La strategia per situaziuns da mancanza cumpiglia trais fasas. En l’emprima vai per reducir energia, tranter auter cun sbassar las temperaturas u reducir il diever d’ascensurs en edifizis chantunals. Tar la segunda fasa vulan ins minimar l’energia, per exempel cun recumandaziun da homeoffice u cun stizzar tschertas illuminaziuns. La fasa finala prevesa da spargnar energia tar indrizs da construcziun bassa, per exempel cun reducir l’energia en tunnels, ubain cun serrar indrizs e metter ensemen plazzas da lavur nua che quai è pussibel. Grazia a l’aura miaivla èn ins anc en l’emprima fasa, cun la quala ch'ins ha pudì reducir l'agen consum d’energia dal chantun per 15%.

L’appel da spargnar resta

La campagna federala che supplitgescha la populaziun da spargnar energia dura anc enfin l’avrigl. Er sch’ins n'ha anc naginas datas davart il success da quella campagna restia impurtant da vinavant appellar a las contribuziuns individualas, di la scheffa dal departament d’energia grischun, Carmelia Maissen.

Er sche nus n'avessan quest enviern betg ina mancanza d’energia, resta quai probabel in tema era per l’enviern proxim.
Autur: Carmelia Maissen cussgliera guvernativa e scheffa dal departamaint d'energia

I saja grev da prevesair la situaziun a lunga vista, il chantun na sa lascha però betg influenzar da l’aura miaivla u da prognosas optimisticas, agiunscha Thomas Schmid. Il concept ch’è vegnì activ il settember è fatg ed ins saja pront per situaziuns da mancanza.

RTR actualitad 07:00

Artitgels legids il pli savens

Scrollar a sanestra Scrollar a dretga