Il Cussegl federal vul puspè entrar en tractativas cun l'Uniun europeica. El ha deliberà las directivas da basa per il mandat che duai esser finalisà enfin la fin da l'onn. Il cuntegn è confidenzial perquai ch'i sa tracta dal coc da las tractativas per stabilisar las relaziuns cun l'UE e far part al martgà europeic senza barrieras.
Previs èn duas ulteriuras cunvegnas – ina davart l'electricitad ed in'autra davart la segirezza da victualias. En mira èn era collavuraziuns en il sectur da sanadad ed access a programs futurs da l'UE, però era da puspè far part al program europeic da perscrutaziun «Horizon Europe».
