Nov schef per l'armada
Tar l'armada vegn en futur Benedikt Roos ad esser il schef. El surpiglia a partir da l'onn proxim. Roos è dapi il 1997 sco uffizier da professiun tar l'armada. Fin oz ha el fatg atras pliras scolaziuns e lavurà en differents posts da cader. Plinavant ha el studegià politica da segirezza e management da crisas a l'ETH Turitg. Actualmain è Benedikt Roos – da rang divisiunari – manader da las Forzas terrestras (Heer).
Jau sun persvas, ch'il divisiunari Roos vegn a manar l'armada cun success en l'avegnir.
Il cusseglier federal, Martin Pfister, ha declerà a l'infurmaziun ch'il post sco schef da l'armada na saja betg vegnì inserà publicamain. Suenter sis discurs cun candidats potenzials haja Martin Pfister proponì da surdar il post a Benedikt Roos. «Jau sun persvas, ch'il divisiunari Roos vegn a manar l'armada cun success en l'avegnir.»
I saja ina «incumbensa nobla» da dastgar contribuir sia part per noss pajais, ha ditg Benedikt Roos.
A l'infurmaziun da medias è il nov schef da l'armada era gist vegnì cunfruntà cun emprimas dumondas. Uschia ha Benedikt Roos per exempel prì posiziun davart il pretsch per ils novs jets da cumbat F-35, ch'è ussa pli aut che previs. El saja be stà responsabel per l'organisaziun cumplessiva da la cumpra, il contract n'haja el mai vis e cunquai era betg gì dubis ch'il pretsch fixà pudess sa midar, respunda Roos.
Servetsch d'infurmaziun en novs mauns
Sco nov directur dal Servetsch d'infurmaziun da la Confederaziun ha il Cussegl federal elegì Serge Bavaud. El ha 52 onns ed ha studegià istorgia ed economia. Plinavant ha el fatg pliras scolaziuns en il sectur economia e leadership. Tar la Confederaziun ha el lavurà en pliras funcziuns tar il Departament da defensiun, protecziun civila e sport. Tranter auter ha el manà il center per manaschament da crisas, sco er en autras funcziuns da cader.
Benedikt Roos e Serge Bavaud suondan a Thomas Süssli e Christian Dussey. Els dus avevan avant in mez onn annunzià da sa retrair. Dapi là eran duas posts impurtants per la segirtad en Svizra a la tschertga da successurs.