Quai è la situaziun: La Svizra n'ha betg pudì defender il pretsch fix da 6 milliardas francs e sto uss quintar cun custs supplementars da 10 fin 21%. Malgrà plirs discurs – in tranter il minister da defensiun Martin Pfister e ses collega d'uffizi american Pete Hegseth – insitian ils Stadis Unids sin in pretsch da cumpra pli aut ch'oriunadamain fixà. Uschia sto la Svizra tragutter custs supplementars da 0,65 fin 1,3 milliardas francs.
Cumprar damain jets saja in'opziun: Tenor il minister da la defensiun, Martin Pfister, saja pussaivel che la Svizra cumpria en consequenza damain jets da cumbat F-35. Oriundamain eri planisà da cumprar 36 aviuns F-35 novs per il pretsch fix da 6 milliardas francs. Quai saja ina da pliras opziuns, ha ditg il minister da defensiun Martin Pfister avant las medias a Berna.
Ulteriuras opziuns fissan da cumpensar ina part dals custs supplementars cun fatschentas «d'offset» cun il produzent american Lockheed Martin. Era pussibel saja da finanziar ils custs supplementars cun in credit parlamentar. La Svizra stoppia uss acceptar quella nova situaziun, manegia Martin Pfister: «Nus stuain chattar vias, co vegnir a frida cun quests custs supplamentars.»
Custs totals restan intscherts: Tenor il Cussegl federal saja per il mument betg pussibel da numnar in pretsch da cumpra exact. Quel dapendia per gronda part era dal svilup da la chareschia en ils Stadis Unids, dal svilup dal pretsch per
materias primas internaziunalmain sco era da facturs sco l'augment dals pretschs pervi dals dazis americans.
I drova ina nova analisa: Il Cussegl federal ha uss incumbensà il departement per la defensiun d'analisar danovamain la cumpra dals jets da cumbat F-35 sut las novas cundiziuns. Fin la fin november duain pliras opziuns vegnir examinadas en detagl. Cler è dentant che la regenza federala vul vinavant cumprar ils jets F-35, malgrà l'augment da pretsch nunspetà.
