Il Cussegl federal ha deliberà oz il credit d'impegn per ils jets da cumbat per mauns dal parlament. En il messadi da l'armada 2022 vai per dus credits d'obligaziun cun ina valur totala da 8 milliardas francs. 6 milliardas duain vegnir investids en 36 aviuns da cumbat dal model american F-35 A. Plinavant dovri var 120 milliuns francs per adattaziuns da construcziun tar las plazzas d'aviatica.
Ils ulteriurs daners, var 2 milliardas francs, duain vegnir investids en tschintg indrizs da defensiun da l'aria dal model Patriot. Omaduas investiziuns portian il pli grond niz ed ils custs ils pli bass, ha communitgà la Confederaziun.
Il parlament sto anc dar ses consentiment per ils credits. Suenter ch'el ha decidì, po la Svizra suttascriver ils contracts. Sche las suttascripziuns succedan avant la fin da quest onn, pudess la Svizra spetgar ils emprims aviuns gia en tschintg onns, scriva il Cussegl federal. Ils aviuns da cumbat actuals (F/A-18) duain vegnir remplazzads cuntinuadamain fin l'onn 2030.
