L'Allianza cunter l'aviun da cumbat F-35 ha rimnà 100'000 suttascripziuns per l'iniziativa, quai tenor atgnas indicaziuns. Ella spera da pudair inoltrar la stad l'iniziativa che vul impedir la cumpra dals novs aviuns da cumbat. En pli pauc che nov mais hajan passa 100'000 persunas suttascrit l'iniziativa. Actualmain sajan ins anc vid rimnar las suttascripziuns da reserva, per far la segira ch'ins haja avunda valaivlas. Ils iniziants han anc temp fin il prim da mars 2023 per inoltrar l'iniziativa.
Ils iniziants èn plinavant surprais ch'il Cussegl federal ha decis da suttascriver ils contracts da cumpra anc enfin il mars 2023 – senza resguardar l'iniziativa.
Lantschà iniziativa
L'avust 2021 avevan la PS, ils Verds e la Gruppa per ina Svizra senza armada GSoA cumenzà a rimnar suttascripziuns. Per ils adversaris è l'aviun da cumbat F-35 memia char. Plinavant na saja l'independenza betg dada cun in aviun american.
Il Cussegl federal haja ademplì sia obligaziun cun in process d'acquisiziun correct, di Viola Amherd. Uss haja il pievel da decider. La reproscha da la sanestra ch'il Cussegl federal sfarlattia gist uss en temp da corona daners da taglia, na lascha Amherd betg valair.
Nus na cumprassan betg in Ferrari sch'in VW tanschess.
Decis da cumprar aviuns da cumbat aveva il suveran cun in resultat fitg stgars – da lezzas uras dentant anc senza savair tge tip d'aviun ch'il Cussegl federal tscherna la finala.
