Il Cussegl federal discuta a chaschun dad ina sesida virtuala da Silvester areguard la situaziun da corona. La mesemna aveva il minister da sanadad Alain Berset communitgà, ch'il Cussegl federal desistia en il mument sin ulteriuras mesiras per far frunt a la pandemia da corona. Uss s'inscuntra la regenza però tuttina anc avant il nov onn. Quai a chaschun dad ina radunanza extraordinaria virtuala, ha communitgà il pledader dal Cussegl federal André Simonazzi via Twitter.
Il minister da sanadad Alain Berset ha gì la mesemna in barat cun il president da la Confederaziun Guy Parmelin ed il president dals directurs e las directuras da sanadad Lukas Engelberger. Suenter il barat aveva el communitgà ch'il Cussegl federal saja pront da reagir, sche la situaziun sa pegiureschia. In proxim pachet cun mesiras saja gia avant maun e quel prevesia er serradas.
