Siglir tar il cuntegn

Header

cuntegn

Cussegl federal Taglia minimala duai ir il 2024 en vigur

Il Cussegl federal ha decis da realisar la taglia minimala globala, ch'è vegnida decretada da l'OECD, entras ina midada da la constituziun. Sin basa dad in'ordinaziun temporara duai la la taglia minimala ir en vigur l'entschatta 2024. Silsuenter duai la lescha vegnir relaschada sin via ordinaria.

Tenor il Cussegl federal duai l'adattaziun vegnir fatga cun resguard sin la plazza economica svizra. Ensemen cun il parlament, ils chantuns e la populaziun, che vegn a decider a l'urna en chaussa, vul la regenza stgaffir segirtad legala per las interpresas pertutgadas – per quest intent duai dar ina nova basa constituziunala. Ordavant ha el dentant decis in'ordinaziun temporara, quella metta en vigur la taglia minimala a partir dal prim da schaner 2024. Silsuenter possian ins elavurar senza squitsch ina nova basa constituziunala, hai num en la communicaziun.

Taglia minimala globala

Avrir la box Serrar la box

137 pajais sin l'entir mund èn sa cunvegnids sin ina taglia minimala da 15% per interpresas internaziunalas cun ina svieuta sur 750 milliuns euros. Sch'in pajais resta pli bass che quests 15% pon tschells pajais dumandar per dapli taglia da las interpresas. Entras l'integraziun da la taglia minimala en il dretg svizzer vul il Cussegl federal evitar dispitas en l'exteriur. En pli na vul la Svizra betg perder entradas fiscalas.

La taglia minimala duai vegnir realisada cun resguard sin il federalissem. Per interpresas cun focus svizzer na duai sa midar nagut, medemamain per interpresas pitschnas e masaunas. Il Cussegl federal ha decis quests puncts:

  • Garantir la taglia minimala per interpresas internaziunalas cun ina svieuta annuala da 750 milliuns euros e dapli
  • Ils chantuns duain incassar la taglia supplementara. Las entradas supplementaras van als chantuns.
  • Las entradas supplementaras èn suttamessas a las reglas da la gulivaziun da finanzas naziunala.

Consequenzas per la plazza Svizra

Differentas interpresas en Svizra vegnan a pajar dapli taglia. Entras las mesiras dal Cussegl federal na vegnan ellas dentant betg ad avair proceduras supplementaras en l'exteriur. La Svizra ha tenor il Cussegl federal avunda spazi d'agir per restar ina plazza attractiva. Ils chantuns duain pudair decider a moda suverana davart mesiras per rinforzar lur attractivitad per interpresas.

audio
Per tadlar curt e cumpact
ord RTR Audio dals 13.01.2022.
laschar ir. Durada: 1 minuta 21 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga