Siglir tar il cuntegn

Header

video
Berset: «Nus savain, il temp difficil vegn pir ils proxims mais»
Or da News-Clip dals 24.09.2021.
laschar ir. Durada: 27 Secundas.
cuntegn

Cussegl federal Tests restan gratuits fin ils 10 d'october

Ils tests da corona restan gratuits per diesch ulteriurs dis. Quai ha il Cussegl federal communitgà suenter sia sesida emnila. Il Cussegl federal propona era che tests per persunas ch'èn vaccinadas ina giada, restian gratuits fin la fin da november.

Uschia na dettia betg custs per quels e quellas che spetgan sin la segunda squitta. Quella proposta va en consultaziun fin ils 28 da settember. Per avair temp per questa consultaziun e per sustegnair las vaccinaziuns, prolunghescha la Confederaziun era ils tests gratuits per tuts fin ils 10 d'october.

Il Cussegl federal è vinavant da l'avis ch'i na saja betg l'incumbensa da la generalitad da pajar tests per persunas che na sa laschan betg vaccinar. L'emna passada hai dà 600'000 tests per certificats, ed en il temp pli fraid quinta la Confederaziun cun 1 milliun tests per emna. Quai èn custs da radund 47 milliuns francs, che la Confederaziun avess da surpigliar mintg'emna.

audio
Tests gratuits fin la fin da november per persunas cun l'emprima vaccinaziun
ord Actualitad dals 24.09.2021.
laschar ir. Durada: 3 minutas 20 Secundas.

Dapli vaccinaziuns

Dapi ils 13 da settember vala l'obligatori da certificat tranter auter en restaurants ed indrizs da divertiment. Quai e la situaziun cun dapli ospitalisaziuns haja motivà blers da sa laschar vaccinar. L'entschatta avust devi radund 8'000 vaccinaziuns per di, mez settember eran quai 20'000 – e dapi curt fin 30'000 emprimas vaccinaziuns per di.

Custs supplementars da 280 milliuns francs

Cun la prolungaziun da tests gratuits per 10 dis e l’augment da tests dapi ils 13 da settember – datti custs supplementars da radund 160 milliuns francs per la Confederaziun. Sch’ils tests restan gratuits per persunas vaccinadas ina giada fin la fin da november, datti anc ina giada custs da 120 milliuns francs.

Promover la vaccinaziun

Il dumber d’infecziuns e d’ospitalisaziuns saja sa reducì, ma la circulaziun dal virus po crescher il temp che vegn. La Svizra ha ina bassa quota da vaccinaziuns, e be cun in augment dal tempo da vaccinaziun possian ins franar il virus. La vaccinaziun è gratuita per tuts e tuttas.

Post d'annunzia naziunal per certificats

Tuttas persunas ch'èn vaccinadas cun in vaccin acceptà da l'Agentura da medischina europeica EMA pon avair in certificat da Covid svizzer. Responsabels èn ils chantuns. Per simplifitgar quest process vul la Confederaziun endrizzar in post d'annunzia central electronic. Là pon visitaders e visitadras da la Svizra arcunar las datas neccessarias per il certificat. Il post duess esser pront davent dals 11 d'october. Quai fa era part da la consultaziun fin ils 28 da settember.

video
Berset: «Nus essan vi d'organisar in vaccin alternativ»
Or da News-Clip dals 24.09.2021.
laschar ir. Durada: 26 Secundas.

La Confederaziun saja fitg datiers da procurar il vaccin da Johnson & Johnson, ha ditg Alain Berset a la conferenza da medias. Indicaziuns pli exactas na possia el betg far. Dapli infurmaziuns pon ins spetgar l'emna che vegn.

Glista da pajais da risico è actualisada

Il Secretariat da stadi per la migraziun ha actualisà la glista da pajais da risico en coordinaziun cun ils auters pajais da Schengen. Uruguay n'è betg pli sin questa gliesta. Nov sin la gliesta èn l'Albania, l'Armenia, l'Aserbaidschan, il Brunei, il Giapun e la Serbia.

Esters che vegnan ord in da quests pajais na dastgan betg entrar en Svizra sch'els na pon betg preschentar ina vaccinaziun approvada. Svizzers e Svizras dastgan adina entrar la Svizra, ston dentant preschentar in test negativ sch'els n'èn betg vaccinads.

RTR novitads 14:00

Artitgels legids il pli savens