Il minister da las finanzas, Ueli Maurer, è per evaluar la durada da la quarantina. Quai ha el ditg en l’emissiun «Eco Talk» dad SRF. Sche la persuna impurtanta manchia en in pitschen manaschi, manchian 100%. La varianta omicron saja ina sfida per l’economia svizra. Blera glieud manchia al post da lavur pervi da la quarantina. Perquai pretendan associaziuns economicas ed era directuras e directurs da sanadad da scursanir la quarantina sin tschintg dis.
Serrar indrizs publics na saja il mument betg necessari, ha ditg Maurer. La situaziun en ils ospitals saja anc ruassaivla. El sez saja era da l'opiniun ch'ins stoppia evitar da stuair serrar insatge. Evident saja che la Svizra dovria dapli letgs en las staziuns intensivas. Ins stoppia chattar ina schliaziun per futuras pandemias.
Il Cussegl federal pudess decider la mesemna en chaussa.
