En Svizra lavuran circa 360'000 frontaliers. Ina buna part da quels, cunzunt en las regiuns periferas, vegnan cun l’auto a lavurar. Quai è era tut legal. Quai ch'els na dastgan dentant betg far, è duvrar l’auto privat per la lavur. Quai scumonda la lescha da duana.
Quai mainia a la situaziun absurda ch'ina persuna che schubregia per exempel abitaziuns da vacanzas stoppia laschar l'agen auto al sez da la fatschenta nua ch'ella lavura e stoppia prender in auto da fatschenta per ir a schubregiar. La realitad saja dentant savens che quellas persunas giajan direct tar l'abitaziun da vacanzas e quai cun l’agen auto privat. Gliez saja dentant illegal, scriva il cusseglier dals chantuns grischun Martin Schmid da la PLD en sia moziun. Il Cussegl federal duaja perquai proponer ina midada da la lescha per legalisar quai.
Soluziun pragmatica
En la Chombra pitschna ha el cun sia moziun gia chattà ina maioritad. Oz ha era la Chombra gronda dà claramain suatientscha. Numnadamain cun 137 cunter 44 vuschs. Sustegnì la moziun ha per exempel era la cussegliera naziunala grischuna Magdalena Martullo da la PPS.
In tal traffic da sviament è era per la regiun in grond burdi ed era betg ecologic. Perquai èsi segir pragmatic sch’ins di ch’ins fa ina schliaziun speziala.
Cun quella posiziun è ella dentant stada claramain en la minoritad en sia partida. Bunamain l’entira fracziun da la PPS ha votà Na a la moziun. Uschia era la cussegliera naziunala Céline Amaudruz da Genevra.
Da quai da 100'000 frontaliers traversian mintga di il cunfin per vegnir a lavurar en la regiun da Genevra. Sch'ins legaliseschia ussa il diever d'autos privats na motiveschia quai betg ils frontaliers da duvrar il traffic public.
Anzi, i dat dapli polluziun e dapli colonnas sin las vias.
Ultra da quai na saja quai era betg gist envers las persunas emploiadas cun in auto svizzer che pajan per regla dapli taglias e taxas per lur autos.
Magdalena Martullo vesa quai in zic auter.
Jau dubit ch’ils Svizzers pateschan uschè fitg da quai. Ils avantatgs predomineschan, segir era per in chantun sco il Grischun che ha en tschertas regiuns sco per exempel en l’Engiadina blers frontaliers.
E questa opiniun ha dominà en il Cussegl naziunal. Sustegnì la moziun ha dal reminent era il Cussegl federal. La cussegliera federala ed ministra da finanzas Karin Keller-Sutter ha empermess da realisar la legalisaziun dal diever d'autos da frontaliers per la lavur en la proxima revisiun da la lescha da duana.
