La SBB duai survegnir da la Confederaziun in pajament unic dad 1,15 milliardas francs. Quai ha il Cussegl naziunal decidì. Cun ils daners duain las Viafiers federalas reducir ils daivets che derivan dal temp da corona.
La chombra gronda ha acceptà cun 126 cunter 65 vuschs la lescha federala midada davart las Viafiers federalas svizras. Sco proxim decida il Cussegl dals chantuns davart la fatschenta.
Grazia a questa mesira duaja l'abilitad d'investir da l'SBB vegnir segirada, ha ditg il pledader da la cumissiun, Christian Wasserfallen. Entant che las Viafiers federalas hajan gì resultats da fatschenta positivs avant la crisa da corona, sajan las cifras suenter idas engiu fermamain.
Per reducir l’indebitament net vul il Cussegl federal pajar a las Viafiers federalas quest pajament unic da 1,15 milliardas francs – à fond perdu. Il glindesdi aveva il cussegl naziunal gia integrà la summa en il preventiv federal per l’onn proxim.
