Siglir tar il cuntegn

Header

Purtret dad ina persuna che porta ina giacca dal servetsch civil.
Legenda: Keystone
cuntegn

Cussegl naziunal Obstachels per midar en servetsch civil fan naufragi

Il project che vuleva far pli cumplitgada la midada dal militar en il servetsch civil, ha fatg naufragi en il Cussegl naziunal. Finamira dal project era, che l'armada na perdia betg tanta schuldada. Uss è la fatschenta giud maisa.

Il Cussegl naziunal ha sbittà la fatschenta cun 103 encunter 90 vuschs e 5 abstenziuns. Il Cussegl dals chantuns aveva anc approvà quella cun 33 encunter 12 vuschs e naginas abstenziuns.

Temp da spetga dispitaivel

Dispitaivel durant la debatta è stà il temp da spetga dad in onn per militars che avessan vulì midar en servetsch civil. Sin dumonda dals sanesters aveva il Cussegl federal perquai sco emprim refusà quai. Sco ultim haja ina minoritad verd-cotschna anc vulì salvar questa part, ma senza success.

Sch'ins fetschia pli nunattractiv il servetsch civil, na daventia perquai il militar betg pli attractiv, ha ditg Priska Seiler Graf (PS/ZH) en il Cussegl naziunal. «Quest temp da spetga n'è nagut auter che schicana», ha ditg Beat Flach (PVL/AG). Il temp da spetga dettia la pussaivladad da propi intercurir endretg la dumonda per midar, ha tegnì encunter Thomas Rechsteiner (PCD/AI).

Tema per dumber da schuldads

Raschun per la midada da la lescha è stà il quità per il dumber da schuldads tar l'armada svizra. L'interess per il servetsch civil è creschì andetg cun abolir l'examinaziun da la conscienza il 2009. L'ultim è il trend dentant puspè ì enavos. Dasper l'onn da spetga fissan anc autras mesiras stadas planisadas.

La federaziun dal servetsch civil Civiva, la Gruppa per ina Svizra senz'armada (GSoA), ils Verds e la Partida socialdemocratica avevan uschè u uschia annunzià d'inoltrar in referendum. Er la PVL ha vulì sustegnair in tal.

RTR novitads 11:00

Artitgels legids il pli savens

Ir a sanester Ir a dretg