A partir dal december da l'auter onn duain tut las persunas pensiunadas avair dapli daners en la bursa. Lura vegn pajada la 13avla renta da l'AVS per l’emprima giada . Avant circa in onn e mez han las Svizras ed ils Svizzers ditg gea a l'iniziativa da la sanestra. Cura ch'ella duai vegnir pajada per l’emprima giada è pia cler. Anc betg decidì è co quella duai vegnir finanziada. Suenter il Cussegl dals chantuns è oz era s'occupà il Cussegl naziunal cun questa dumonda che sparta era las opiniuns da la delegaziun grischuna.
Il Cussegl federal quinta cun custs da passa quatter milliardas francs per la renta supplementara. La regenza è perquai da l’opiniun ch'i dovra bain spert ina decisiun co finanziar questas expensas supplementaras. Elisabeth Baume Schneider, la cussegliera federala responsabla, ha perquai presentà gia avant in onn sia proposta – in augment da la taglia sin plivalur da 0,7 puncts procentuals.
Per la liberaldemocrata Anna Giacometti il signal fallà. Enstagl da simplamain stuppar rusnas avessi il Cussegl federal plitost stuì preschentar ina strategia generala co ch'el veglia segirar la finanziaziun da l'AVS era per las proximas generaziuns. Ina tala sto il Cussegl federal preschentar enfin la fin da l'auter onn. Per Anna Giacometti na fai perquai betg prescha.
La 13avla renta da l’AVS vegn pajada per l’emprima giada la fin da l’auter onn. Perquai na stuain nus betg gia decider quest onn e nus pudain nizzegiar quest onn per avair ina survista e per chattar ina schliaziun era per il futur.
D'autra opiniun è il socialdemocrat Jon Pult. Da las opziuns che sajan ussa sin maisa saja quella ch'il Cussegl dals chantuns haja elavurà la meglra. Quella prevesa bain era in augment da la taglia sin plivalur, dentant cun 0,5 puncts procentuals in pli bass ch'il Cussegl federal. Persuenter duain era las deducziuns sin la paja vegnir augmentads levet. Per Jon Pult dess quai lura ina finanziaziun pli gista e pli sociala.
Entras quai pajan quels cun pajas autas dapli, era ils patruns pajan ina part e betg tut sto ir via in augment da la taglia sin plivalur. Quai è pli social e pli correct.
Mo quai engrevgeschia la plazza da lavur e l'economia svizra, crititgescha Anna Giacometti la proposta da Jon Pult. Sche ussa decider ina finanziaziun da la 13avla renta da l'AVS, lura unicamain cun in augment da la taglia sin plivalur, gist sco quai ch'il Cussegl federal e la cumissiun dal Cussegl naziunal proponian quai.
Lura pajan era persunas pensiunadas che profiteschan da questa 13avla renta da l’AVS. Era giasts e turists che vegnan en Svizra pajan dapli sche la taglia sin plivalur vegn augmentada. Perquai è quai era la meglra via.
Per Jon Pult na vegn quai betg en dumonda. Pertutgads da quai augment da la taglia sin plivalur fissan en emprima lingia quellas persunas che stoppian gia ussa volver mintga rap.
La taglia sin plivalur fa pli char il consum. Quai vul dir persunas che han relativamain paucs daners e che dovran ina gronda part da quels daners per products da la vita quotidiana pajan uschia a moda surproporziunala.
Finanziar la 13avla renta da l'AVS via in augment da la taglia sin plivalur ni cumbinar quella cun in augment da las deducziuns sin las pajas? Suenter ina debatta intensiva ha il Cussegl naziunal decidì stretgamain per in augment da la taglia sin plivalur da 0,7 puncts procentuals che duai dentant esser limità enfin la fin dal 2030. La fatschenta turna ussa el Cussegl dals chantuns.