En la sessiun d'atun èn vegnids terminads 26 projects dals dus cussegls. La sessiun è stada marcada d’iniziativas. En tut èn vegnidas debattadas sis iniziativas. Ina da quellas ha perfin rut in record en il Cussegl naziunal. Ina debatta da passa 11 uras cun 115 oraturas ed oraturs hai dà tar l’iniziativa da persistenza da la partida populara svizra. Quella vul limitar la populaziun fin il 2050 sin 10 milliuns. La chombra gronda ha però cleramain refusà l’iniziativa. Quella saja in privel per il bainstar da la Svizra è tranter auter vegnì argumentà.
In auter dals gronds temas è stada la finanziaziun da la 13avla renta da l'AVS. Il suveran aveva decidì l’onn passà ch'i duai dar ina 13avla AVS. Uss debattescha il parlament co finanziar quella che chaschuna tenor la Confederaziun custs da 4,5 milliardas francs l’onn fin il 2030. Il Cussegl naziunal vul finanziar quella sulettamain cun la taglia sin plivalur entant ch’il Cussegl dals chantuns vul era finanziar quella cun ina part da las deducziuns da las pajas. La debatta n'è anc betg decidida e cuntinuescha en la proxima sessiun.
Dasper las debattas ha dentant era ina novitad trista tutgà il parlament. Il cusseglier naziunal da la PPS da Turitg Alfred Heer è mort nunspetgadamain. Il parlament ha commemorà a lur collega.
Las decisiuns e debattas per leger suenter:
Themen in diesem Newsticker
- Il Cussegl naziunal na vul betg limitar il dumber d'abitants
- Levgiaments per installar indrizs solars
- La protecziun per il luf sut squitsch
- Cussegl dals chantuns vul ina taxa per il traffic da transit
- Cussegl dals chantuns vul rentabilisar da reciclar vaider
- Segirar meglier dunnas en speranza senza assicuranza
- Dapli coordinaziun tar la planisaziun d'ospital
- Cussegl naziunal vul abolir la renta da vaivas per vita duranta
- Parlament vul controllas pli severas d'investiziuns da l'exteriur
- Proceduras d’asil pli restrictivas
