La notg sin venderdi ha il Blick infurmà sin ils chanals digitals ch'era el saja pertutgà da l'attatga da cyber sin la gruppa da medias NZZ. Concret sajan vegnids engulads ils nums e las adressas d'abunents dal Blick e dal Sonntagsblick en ils chantuns Argovia, Soloturn e Basilea-Champagna. Tut tenor il resultat dals ulteriurs scleriments veglia il Blick infurmar directamain ils pertutgads.
Tut las gronda chasas edituras pertutgadas
Avant intginas emnas avevan nunenconuschents attatgà l'infrastructura d'IT da la gruppa da medias NZZ. Las datas enguladas èn pli tard vegnidas publitgadas en il Darknet. Pertutgada da l'attatga da hackers è era l'interpresa da medias CH Media, cun quai ch'ella retira servetschs d'IT da la NZZ. In'interpresa, che tutga tar CH Media, è responsabla per la distribuziun dal Blick, uschia ch'ina ulteriura chasa da medias è ussa pertutgada directamain da l'attatga da cyber. Sper la gruppa dal Blick èn era datas da clients da gasettas da Tamedia pertutgadas, quai scriva la chasa editura en sias gasettas dal venderdi. I sa tracta d'adressas da distribuziun or dals medems chantuns sco tar il Blick.
CH-Media
Hackers han publitgà datas confidenzialas da l'interpresa CH Media. La fin da mars aveva la gruppa Play fatg in'attatga da cyber sin l'interpresa e mess quella sut squitsch. Tenor il portal online inside-it.ch tutga Play tar las diesch bandas ch’èn actualmain las pli activas e duai esser responsabla per radund 5% da las attatgas da Ransomware (programs nuschaivels cun ils quals hackers pon entrar en ils sistems d'informatica) sin l’entir mund dapi l’entschatta da l’onn.
Naginas datas da clientas e clients da CH-Media
Las datas publitgadas derivan tenor CH-Media dad organisaziuns da distribuziun e betg da la clientella. Tar las infurmaziuns publitgadas sa tractia da datas da las organisaziuns da distribuziun, ha CH-Media communitgà. Las datas da clients na sajan betg pertutgadas tenor il stan d’infurmaziun da fin qua. Ulteriuras examinaziuns detagliadas sajan instradadas tar ella. Tut tenor las enconuschientschas e la sensibilitad da las infurmaziuns vegnissan persunas pertutgadas infurmadas directamain.
Er il producent da maschinas da cuser Bernina è pertutgà
Ils criminals hajan survegnì datas sensiblas ed hajan publitgà quellas online. L'interpresa n'è betg entrada sin pretensiuns da daners. L'attatga cun software donnegiusa saja capitada avant trais emnas ed haja er limità il manaschi.
Tar las datas enguladas tutgavan tranter auter documents da fatschenta, copias da documents da legitimaziun da collavuraturs, pleds-clav, decleraziuns da secretezza ed offertas d’engaschament.
