Per exempel pajan turists a Saas Fee en il Vallais ed a Montreux cun 7 francs per notg passa 7 giadas dapli che turists a Zug cun be 95 raps. Ma, era entaifer il medem chantun datti grondas differenzas: Uschia pajan giasts a Cuira 2 francs e 35 per notg. A Scuol gia 2 francs e 70, ed a Claustra 5 francs e 50. Tavau pretenda perfin 5 francs e 90 raps.
Quai mussa in'analisa dal servetsch da cumparegliaziun Comparis ch'ha examinà 80 vischnancas. La media da la taxa per creschids per ina notg munta a 3 francs e 75 raps.
Grondas differenzas
Tenor Leo Hug, l'expert per taxas da Comparis, saja la raschun ch'ils politichers regiunals stoppian strusch resguardar ils basegns da lur clientella. La finala pajan ils giasts la taxa e betg ils indigens.
Tschintg vischnancas van atgnas vias
Uschia pajan ins numnadamain nagina taxa da cura a Flem, Schlarigna, en Val Müstair, ad Andermatt ed Engelberg. Quellas vischnancas sa concentreschan sin la taglia per segundas abitaziuns.
Las entradas da las taxas da cura vegnan duvradas per la finanziaziun da la purschida turistica dal lieu. Savens vegnan uschia purschidas reducziuns dal pretsch per spiertas turisticas al lieu, sco per exempel per il traffic public.
