La Svizra sgola a chasa 630 turists ch'èn bloccads en il Peru e la Columbia. Il Departament d'affars exteriurs EDA organisescha il return a chasa dals turists svizzers en collavuraziun cun la societad aviatica Edelweiss. Per mardi e mesemna che vegn èn previs dus sgols da charter.
En tscherts cas na lubeschian las circumstanzas avant lieu betg pli d'organisar sez il return en Svizra, ha argumentà l'EDA questa acziun. Il minister da l'exteriur Ignazio Cassis, ha perquai ordinà il center per management da crisa, dad organisar il return dals turists.
EDA dovra anc lubientscha da sa platgar
Ensemen cun organisaturs da turas e federaziuns da viagiar, ha l'EDA lavurà ils ultims dis a moda intensiva, per chattar pussaivladads da contactar turists e vegnir enavos cun quels en Svizra. L'EDA ha fittà dus aviuns. Quels sgolan mardi e mesemna en las chapitalas Bogota (Columbia) e Lima (Peru). Il departament è vidlonder d'organisar las lubientschas necessarias per sa platgar tar las autoritads responsablas. La Confederaziun finanziescha ordavant quest sgols, ma ils turists ston pajar sez lur ticket e cun quai surpiglia sez ina part dals custs.
S'annunziar via app!
L'EDA parta dal fatg che anc adina plirs 10'000 viagiaders svizzers sa chattan en l'exteriur. Sin l'applicaziun Travel Admin App dal departament per affars exteriurs sajan dentant pir radund 7'700 persunas sa registradas, scriva l'EDA. Ignazio Cassis supplitgescha tut ils pertutgads da s'annunziar sin l'app. «Be uschia pudain nus far in purtret da la situaziun sin il mund».
