En il chantun Uri restan ils implants d'ir cun skis serrads davent da mardi, ils 22 da december fin mardi, ils 29 da december. Uschia veglian els sbassar il privel d'accidents, ed evitar ch'ils ospitals vegnian anc dapli sut pressiun, ha la regenza uranaisa communitgà. La decisiun hajan els prendì en cunvegnientscha cun ils auters chantuns da la Svizra Centrala.
Moviment en il liber pussaivel
Betg avrir dastgan runals e sutgeras ed igl è scumandà da preparar pistas da skis e da scursalar. Pendicularas dastgan dentant transportar glieud. Vinavant duain sendas da spassegiar e loipas per far passlung restar avertas. La populaziun duai survegnir la pussaivladad da pudair sa mover en il liber.
