Quest'emna ha lieu la terza ediziun da l'emna da barat. Organisada vegn ella da Movetia, l'agentura naziunala per barat e mobilitad, en collavuraziun cun ils chantuns. La finamira centrala è da scuvrir autras regiuns linguisticas da la Svizra per promover la chapientscha vicendaivla ed era promover l'emprender linguas.
Betg mo scola obligatorica – ma era furmaziun professiunala
Sco partenaria da medias sustegnan ils emetturs da la SRG SSR quell'emna e l'accumpognan cun contribuziuns. L'onn passà avevan 3'500 scolars e scolaras da l'entira Svizra surpassà ils cunfins per l'aventura linguistica. Quest onn è l'emna schlargiada era per la furmaziun professiunala.
Emprima giada in premi per projects exemplarics
In'ulteriura novaziun è il premi naziunal per il barat. In premi deditgà als trais projects da barat che vegnan valitads sco exemplarics per la scolaziun professiunala. Surdà vegn il premi mardi (25-11-2025) en preschientscha dal cusseglier federal Guy Parmelin ed il president da la conferenza dals directurs d'educaziun Christophe Darbellay a Berna.
Barat da moderaziun tar SRF, RTS, RSI e RTR
Cun sia purschida collia la SRG SSR di per di las regiuns linguisticas. A chaschun da l'emna da barat naziunala fa ella quai cun in project spezial: moderaturas e moderaturs da SRF, RTS, RSI e RTR barattan lur plaz da lavur per in'emissiun e modereschan il format dad in'autra regiun linguistica – tant a la televisiun sco er en il radio.
Plurilinguitad tar la SRG SSR
Veglias tradiziuns, dialects sonors, differents stils da viver – las particularitads culturalas e linguisticas rendan unica la Svizra. La SRG SSR s'orientescha als basegns multifars da la populaziun svizra e renda visibla questa gronda diversitad en la vasta purschida da SRF, RSI, RTR e RTS. Saja quai en l'infurmaziun, la cultura, la furmaziun, il sport u il divertiment.
Ed era sin Play Suisse gioga la plurilinguitad ina gronda rolla: cun sia vasta purschida da serias svizras sco «Tschugger» u «L’ultim rumantsch» – ch'èn disponiblas per tudestg, franzos e talian, per part schizunt per rumantsch – cuntanscha la plattafurma da streaming da la SRG SSR tut las regiuns linguisticas.
...è ina agentura che lavura per confederaziun e chantuns. Ella s'engascha per il barat tranter las regiuns linguisticas en Svizra. Dapi 3 onns vegn organisada in'emna da barat speziala. Quest onn statt quella sut l'ensaina dals giuvens e da las giuvnas.