Il martgà da lavur svizzer para definitivamain d'avair surpassà il zenit. L'ultim quartal dal 2023 èsi vegnì creà 4% damain plazzas, cumpareglià cun il quartal avant. Quai mussan las novas cifras da l'index da la gruppa Adecco. Ed er cumpareglià cun il quartal da l'onn passà èn quai 3% pli pauc. L'index vegn eruì ensemen cun il monitoring dal martgà da plazzas Svizra da l'Universitad da Turitg. Guardà sur l'entir onn 2023 è il martgà da lavur svizzer però creschì per 3%.
Dentant che betg pli uschè bler plazzas èn vegnidas creadas e che la quota da dischoccupaziun è s'augmentada inditgeschan ch'il martgà da lavur svizzer na crescha betg pli uschè fitg, hai num en la communicaziun.
Dumber da plazzas libras però vinavant sin nivel istoric
Ina raschun da far quitads na saja questa situaziun anc betg: Malgrà ch'i na saja betg pli vegnir creà tantas plazzas, saja il dumber da las plazzas libras vinavant sin in nivel istoric e la quota da dischoccupaziun en cumparegliaziun relativamain bassa, hai num vinavant.
