Siglir tar il cuntegn

Header

audio
Mezdi: Stalking – Cussegl naziunal decida basa legala per mesiras
Or da Actualitad dals 18.09.2018.
laschar ir. Durada: 4 minutas.
cuntegn

Svizra Dapli protecziun per victimas da violenza a chasa e stalking

Il parlament vul proteger meglier unfrendas da violenza a chasa e da stalking. Suenter il Cussegl dals chantuns ha er il Cussegl naziunal approvà in sboz da lescha correspundent. Tranter auter duain dretgiras pudair ordinar che stalkers ston purtar ina surveglianza electronica.

Victimas da violenza a chasa u stalking duain vegnir protegidas meglier – quai l'intent dal parlament. Savens cumenzan cas da violenza cun esser schiglius, la vusch vegn auzada e tuttenina glischna ora il maun ed en il cas pli mal datti morts. Las cifras da violenza a chasa sajan alarmantas, ha punctuà il Cussegl naziunal il mardi da dretga enfin sanestra. L'onn passà èn vegnids registrads passa 17’000 delicts da quest gener – quai èn 46 annunzias al di. 74 cas èn stads emprovas da mazzar la partenaria e 21 da quests cas èn ids a finir cun la mort.

Victimas sut squitsch

En futur duessan victimas per consequenza vegnir protegidas meglier. Da sistir sin in'annunzia duai vegnir pli grev. La raschun è, che actualmain fin a 92% da tut las annunzias da tals delicts vegnan retratgas pli tard. Ins suppona che quai capita en blers cas sut squitsch. Perquai duai la procura publica examinar correctamain mintga cas che vegn retratg e pudair decider sche quai è pussaivel u betg. Cunquai vul il parlament prender davent il squitsch da las victimas

Tracking cunter stalking

La finamira da la revisiun n'è betg sulettamain da pudair reagir pli svelt ed effectiv, cura ch'ils flatgs blaus èn visibels u la psica patescha. I duai er pudair vegnir agì avant ch'in delict capita. Ina da las mesiras centralas da prevenziun, èn trackers da gps. Quels duain pudair vegnir duvrads plitost en cas da stalking. Uschia han las victimas era cumprovas davant dretgira.

Per schliar differenzas tranter las duas chombras va uss la fatschenta enavos en il Cussegl dals chantuns.

RR actualitad 12:00

Artitgels legids il pli savens