Siglir tar il cuntegn

Header

cuntegn

Decisiun da la BNS La Banca naziunala svizra na mida betg tschains negativ

La Banca naziunala svizra resta tar ils tschains negativs. Concret lascha la banca naziunala il tschains directiv ed il tschains sin deposits tar minus 0,75%. Quai ha communitgà la banca.

Mesemna saira aveva l'institut d'emissiun american FED signalisà ch'i pudess bainbaud dar ina midada tar ils tschains. La Banca naziunala svizra s'orientescha però surtut vi da la Banca centrala europeica che vegn anc a communitgar sias decisiuns da la politica monetara.

Midaments tar il martgà d'immobiglias

Sper ina midada tar ils tschains, han economs era spetgà midaments tar il martgà d'immobiglias. Els han prognostitgà ch'ils pretschs da las immobiglias e da las ipotecas creschan vinavant, e ch'il martgà vegn uschia pli fragil. La Banca naziunala svizra na prevesa dentant betg d'augmentar l'agen chapital per prevegnir ad in svilup fauss sin il martgà da credits. La banca tegnia però en egl la situaziun hai num.

La BNS valitescha il franc sco aut

Vinavant valitescha la banca naziunala il franc svizzer sco aut. Perquai prevesa ella da vinavant intervegnir en il martgà da devisas per ch'il franc na vegn betg memia ferm. Dal 2020 aveva la banca naziunala perquai cumprà per 110 milliardas francs svizzers valutas estras.

audio
Per tadlar curt e cumpact
ord RTR Audio dals 16.12.2021.
laschar ir. Durada: 1 minuta 15 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga