Bun ina milliarda francs survegn la Viafier retica. Quels daners duain vegnir duvrads per mantegnir u megliurar l'infrastructura da la viafier fin il 2028. Er ovras da protecziun cunter privels natirals vegnan sanadas – in'investiziun impurtanta per viafiers da muntogna.
Planisads èn era projects pli gronds: ils tunnels da las lingias d'Alvra e Bernina duain vegnir sanads – quels sajan en media gia passa 100 onns vegls. I saja pia neras uras per sanaziuns pli cumplessivas. Il tunnel d'Alvras vegn remplazzà cumplettamain: uschespert ch'il nov tunnel è pinà duai l'existent tunnel d'Alvra alura mo pli vegnir duvrà sco tunnel da segirezza.
En tut 16,4 milliardas per las viafiers svizras
Questa contribuziun è planisada en il rom d'expensas per ils onns 2025 fin 2028. La finamira saja era qua da sanar e modernisar l'infrastructura da la viafier en Svizra cun quests daners. Quai ha il Cussegl federal communitgà.
A las viafiers svizras stattan pia a disposiziun da nov 2 milliardas francs dapli per sanar l'infrastrucura che durant la perioda actuala. En ses messadi scriva la regenza svizra che l'infrastructura actuala saja en in stan sufficient fin bun.
