Perquai che la Svizra na posseda ni lieus da producziun per gas, ni implants d'accumulaziun, dovri mesiras en cas dad ina mancanza da gas. Latiers existan da principi duas opziuns: midar ils implants che funcziunan cun gas u ieli sin ieli e restrenscher il diever. Talas mesiras vegnan dentant pir introducidas tar ina mancanza da gas, uschia ha communitgà il Cussegl federal la mesemna. Quellas restricziuns duain sulettamain valair temporar e lura puspè vegnir abolidas uschè svelt sco pussibel.
Tge capita tar ina mancanza da gas?
Sch'i vegn tar ina mancanza da gas vegn en in emprim pass fatg in'appell da duvrar damain gas e spargnar. Sche la situaziun na sa megliurescha malgrà l'appell betg, po il Cussegl federal decider che tut ils implants cun funcziun dubla, pia gas ed ieli, ston metter enturn lur implants sin ieli. Entras ina tala midada quinta la Confederaziun da pudair reducir il diever da gas per 15 fin 20%.
Sco proxim pass po la regenza alura decider restricziuns e scumonds da diever. En Svizra vegn ina gronda part dal gas duvrà per stgaudar. Las chasadas han ina cumpart da var 40% al diever da gas: ord quest motiv ston er ellas vegnir integradas en las mesiras. Implants vitals na vegnan betg ad esser pertutgads. Il diever da gas per implants da sport, temp liber u wellness pudess però vegnir scumandà. Talas restricziuns duain evitar da stuair introducir contigents, quels avessan alura ina gronda influenza per l'economia, quai emprova il Cussegl federal d'evitar.
Nus faschain tut il pussibel per evitar ina mancanza.
Ultima ratio – pia sche tuttas mesiras n'han betg purtà fritg – vegn la Confederaziun a decider contingents. Pertutgads fissan tut ils consuments, cun excepziun da chasadas privatas e servetschs da basa fundamentals, sco per exempel ospitals ed organisaziuns d'intervenziun d'urgenza.
Svizra duai spargnar a moda voluntara 15% dal gas
Tar il gas è la Svizra dependenta cumplainamain dad imports. Ina mancanza europeica avess pia er consequenzas per la Svizra. En pli vegniss la cumpra da gas or da l’exteriur pli cumplitgada. Il Cussegl federal ha perquai decis che la Svizra duai spargnar fin a 15% dal gas a moda voluntara. Differents pajais europeics han gia decis in tal pass voluntari. Finamira èsi da spargnar durant ils mais d’enviern – da l'october 2022 fin mars 2023 – 15% gas en cumparegliaziun cun ils ultims tschintg onns.
Las mesiras voluntaras per spargnar gas:
- L'administraziun federala va cun bun exempel ordavant: ella reducescha la temperatura da stgaudar en lur bajetgs e vul reducir il diever d'apparats e computers che dovran electricitad. En pli sclerescha ella sch'ins po prender ensemen differents lieus ed uschia reducir il dumber da las stanzas che ston vegnir stgaudadas.
- Campagna da spargnar: Populaziun ed economia duain sa participar a las mesiras da spargn. Fin avust vul la Confederaziun lantschar ina campagna e mussar si co ins pudess spargnar a moda simpla e nuncumplitgada il diever d'energia.
- Cunvegnas interprofessiunalas: En il rom da las preparativas per la campagna da spargn han differentas branschas gia annunzià lur engaschament. Latiers vegnan differentas mesiras evaluadas, tranter auter cunvegnas voluntaras tranter las branschas, sco per exempel ina limita da stgaudar.
La campagna duai vegnir preschentada l'emna proxima entras la Confederaziun, alura duai er dar dapli detagls en chaussa.
Nagina mancanza en il mument
Tenor il Cussegl federal è il provediment d'energia e gas segirà per il mument. Pervia da la guerra en l'Ucraina e l'interrupziun tar la furniziun da gas da la Russia en l'Europa, sco er la situaziun tar ils implants nuclears en la Frantscha pudess la situaziun però sa pegiurar l'enviern 2022/2023. Quai almain tenor l'Elcom – la cumissiun per l'ectricitad.
Reducir dependenza da gas ed ieli
Per la ministra d'energia Simonetta Sommaruga mussa la crisa actuala quant vulnerabla che la Svizra è tar l'energia, uschè ditg ch'ella è dependenta dad ieli e gas da l'exteriur. La crisa d'energia saja in signal a la Svizra da far enavant e sezza producir dapli energia.
