Siglir tar il cuntegn

Header

cuntegn

Decisiuns Cussegl federal Confederaziun cumpra vaccin cunter virola da schimgias

Ina survista da las decisiuns ch'il Cussegl federal ha prendì la mesemna.

Il Cussegl federal ha decis da cumprar in vaccin cunter la virola da schmigias. La Confederaziun vul cumprar 40'000 dosas e l’armada 60'000. La Confederaziun quinta che var 20'000 persunas vulan sa laschar vaccinar cunter la virola da schigmias.

Tenor il Cussegl federal èsi necessari da far questa cumpra centrala entras la Confederaziun. En il mument furneschan interpresas numnadamain sulettamain il vaccin a stadis. L’Uffizi federal da sanadad vul cumprar en collavuraziun cun l’apoteca da l’armada vaccins da la firma Bavarian Nordic sco er dal producent SIGA.

Introducir tempo 30 vegn pli simpel

Il Cussegl Federal vul simplifitgar l'introducziun da zonas 30. El ha perquai decis che autoritads na dovran a partir da l'onn proxim nagin giudicat pli per introducir zonas da tempo 30. Plinavant duai er daventar pussibel da crear zonas da tempo 30 per augmentar la qualitad da viver.

Tut quai vala per vias che n'èn betg orientadas al traffic, scriva il Cussegl federal. Vias orientadas al traffic èn vias che vegnan duvradas per transports ed en general per l'andament dal traffic effizient. Per quellas na valan las novas reglas betg.

Plinavant vul il Cussegl federal promover cuminanzas da viadi. Per quai ha el decis da crear in nov simbol che po vegnir duvrà per dar lubientscha a cuminanzas da viadi da duvrar strivlas da bus u parcadis spezials. Questas midadas entran en vigur il schaner 2023.

Partidas ston far transparent lur finanziaziun

Las partidas politicas represchentadas en l'Assamblea federala ston da nov annunziar annualmain lur entradas e donaziuns monetaras e betg monetaras, sche lur valur surpassa 15'000 francs per persuna e per onn. Er las contribuziuns da singuls mandataris duain vegnir rapportadas.

Tar votaziuns ed elecziuns dal Cussegl naziunal ston las acturas ed ils acturs che mainan la campagna revelar la finanziaziun sch'els han budgetà passa 50'000 francs. Suenter la votaziun u l'elecziun ston els preschentar il quint final. Tar las elecziuns dal Cussegl dals chantuns valan las reglas da transparenza be per las persunas elegidas. La Controlla federala da finanzas è responsabla per prender encunter, controllar e publitgar las indicaziuns.

Questas novas reglas entran en vigur ils 23 d'october e valan cunquai er per las elecziun naziunalas 2023.

Autoritads averteschan d'ina nova unda da corona

L'immunitad cunter il coronavirus en Svizra è probablamain fitg auta. Il cussegl federal stima che 97 pertschient da la populaziun svizra ha gì contact cun il virus. La raschun saja l'andament da l'unda actuala cun bleras novas infecziuns la stad, uschia scriva il Cussegl federal. Ultra da las infecziuns hajan 70 pertschient da la populaziun svizra survegnì ina immunisaziun da basa. Las autoritads averteschan tuttina d'ina unda da novas infecziuns l'atun, il settember vulan ellas far las recumandaziuns en connex cun la vaccinaziun.

RTR novitads 15:00

Artitgels legids il pli savens

Scrollar a sanestra Scrollar a dretga