Las decisiuns impurtantas
- Las reglas da quarantina da contact vegnan prolungadas enfin la fin da favrer. Il medem vala per l’obligatori da far homeoffice.
- Las ulteriuras mesiras vegnan prolungadas provisoricamain enfin la fin da mars. Il Cussegl federal examinescha regularmain sche la situaziun permetta da schluccar intginas mesiras.
- Certificats da persunas vaccinadas u guaridas valan mo pli 270 dis.
- Persunas guaridas u vaccinadas na ston betg pli mussar in test, sch'ellas arrivan da l'ester en Svizra.
Berset vesa svilup positiv
Il Cussegl federal prolunghescha las mesiras actualas pervia da la situaziun actuala en ils ospitals. Quella saja anc adina tendida. Il Cussegl federal vesia actualmain in svilup positiv. La situaziun sa midia dentant er svelt. Perquai veglian ins restar flexibel per pudair adattar las mesiras actualas a la situaziun. Il minister da sanadad, Alain Berset, manegia, che la Svizra stettia davant in situaziun da midada en la pandemia.
Il Cussegl federal examinescha regularmain, sche la situaziun permetta da schluccar intginas mesiras. Davart las proximas schluccadas da las mesiras discutescha il Cussegl federal ils dus da favrer.
Reglas da quarantina enfin la fin da favrer
Las reglas da quarantina da contact vegnan prolungadas enfin la fin da favrer. Gia l'emna passada ha il Cussegl federal limità la quarantina sin contacts stretgs e sin persunas che vivan en la medema chasada. Il ristg da s'infectar saja là anc adina grond. Perquai prolunghescha la regenza las reglas. Er l'obligatori da homeoffice resta en vigur enfin la fin da favrer. Il Cussegl federal aveva proponì da prolungar las mesiras enfin la fin da mars. Tar la consultaziun han blers chantuns dentant pretendì che las mesiras vegnian mo prolungadas enfin la fin da favrer.
Las ulteriuras mesiras vegnan prolungadas provisoricamain enfin la fin da mars. Quai vala per exempel per la regla da 2G u 2G+ en intgins spazis dadens e l'obligatori da mascrina endadens. Er la regla da 3G per occurrenzas en il liber cun dapli che 300 persunas u las restricziuns per inscunters privats valan provisoricamain enfin la fin da mars.
Certificats valan mo pli 270 dis
Certificats da persunas vaccinadas u guaridas valan mo pli 270 dis. Cun quai resta il certificat svizzer cumpatibel cun ils certificats da l'Uniun europeica.
Entrada en il pajais
Persunas guaridas u vaccinadas na ston betg pli mussar in test sch'ellas arrivan da l'ester en Svizra. Quai vala a partir da glindesdi, ils 22 da schaner. Persunas che n'èn betg vaccinadas u guaridas ston vinavant mussar in test negativ. La Confederaziun desista dentant sin in segund test, quai surtut pervi da la capacitad da testar limitada. Uschia vala cun quai ina regla da 3G per entrar en Svizra.
Grischun è cuntent cun decisiuns
«Il Cussegl federal va vinavant sin la via ch'è sa cumprovada». Uschia commentescha il minister da sandadad dal Grischun, Peter Peyer, las decisiuns dal Cussegl federal. Las decisiuns na sajan nagina surpraisa.