Ins haja ramassà 56'000 vuschs valaivlas, ulteriuras 6'000 vegnian anc verifitgadas. La PS veglia tenor Levrat inoltrar il referendum ils 14 da schaner. En la sessiun d'atun aveva il Parlament federal decidì d'augmentar las deducziuns maximalas per la tgira d'uffants externa – quai dad oz 10'100 sin 25'000 francs. La finamira da quella mesira fiss, che dapli dunnas cun uffants, surtut quellas cun in'auta qualificaziun, giessan vinavant a lavurar.
Cun questa decisiun avess la PS anc pudì viver. Ma ch'il parlament haja sin proposta da la PCD era augmentà las deducziuns generalas per uffants da 6'500 sin 10'000 francs na saja nagut auter ch'in regal da 350 milliuns francs ad onn a famiglias bainstantas.
«In regal per persunas bainstantas»
Bunamain la mesadad da las famiglias en Svizra na paja numnadamain nagina taglia federala directa e possian perquai gnanc profitar da quest augment. Ils adversaris argumenteschan che spezialmain persunas pli ritgas profiteschian dapli da deducziuns pli autas perquai che famiglias pli povras na stoppian gnanc pajar taglia federala.
L'october aveva la PS, ils Verds ed ils Verdliberals cumenzà a ramassar suttascripziuns per il referendum. Per che quel gartegia dovria entaifer 100 dis 50'000 suttascripziuns valaivlas.
Ord l'Archiv:
La PS ha lantschà il referendum:
RTR novitads 09:00
