Il Departement federal da defensiun VBS, da la cussegliera federala Viola Amherd, sto tschertgar da nov ina persuna, sco pli aut schef u scheffa da segirtad da la Svizra. Il secretari da stadi designà Jean-Daniel Ruch ha decidì da betg cumenzar la funcziun.
Amherd ha infurmà la mesemna il Cussegl federal davart la decisiun. Avant bun in mais aveva la cussegliera federala preschentà a las medias Ruch, sco nov schef dal Secretariat da stadi per politica da segirtad che vegn stgaffì da nov.
Pliras medias han rapportà mesemna en concordanza, che Ruch pudess esser extorcabel (erpressbar). Sin dumonda da l'agentura da novitads Keystone-SDA n'ha il VBS betg vulì s'exprimer pli detagliadamain davart la demissiun abrupta.
Il Cussegl federal aveva concludì l'avrigl da stgaffir il nov secretariat da stadi en il VBS. En il futur duai quel elavurar e coordinar ina politica da segirezza cumplessiva per la Svizra. L'impuls per questa novaziun organisatorica ha dà la guerra en l'Ucraina. Uss avra il departament da defensiun puspè il proceder per chattar insatgi nov per il post.
