Di da chauma feministica - «Senza feminissem nagina pasch!»

Impressiuns da la demonstraziun a Cuira

La demonstraziun a Cuira

Il Collectiv feministic dal Grischun ha fatg questa sonda ina chauma a Cuira cun il slogan: «Senza feminissem, nagina pasch». Tenor ils organisaturs èn sa participadas var 300 persunas a la demonstraziun. Cun l'acziun han ellas vulì render attent als suandants temas.

• Per renconuscher e reparter gist la lavur da tgira betg pajada – senza questa lavur stat la societad airi.
• Per dapli protecziun cunter violenza e prevenziun consequenta – a chasa, a la plazza da lavur, en il spazi public.
• Per l'egualitad economica – pajas egualas, rentas segiras ed independenza finanziala per tuttas schlattainas.

A las 11:00 èn las participantas ed ils participants sa radunads sin il Kornplatz per preparar lur stans e per zambregiar tavlas. Il suentermezdi a las 14:00 ha cumenzà la demonstraziun. Las participantas ed ils participants èn ids da la plazza da la staziun si sur il Martinsplatz, sur la Gasse sura fin a l'Obertor e da là sin il Kornplatz.

A l'ur da la via han applaudì, fotografà e smirveglià tschients aspectaturas ed aspectaturs. Dus policists han accumpagnà la demonstraziun, cunzunt per reglar il traffic sin la Grabenstrasse, per che las demonstrantas possian traversar la via. Davent da l'Obertor èn ins alura ì vinavant als stans sin il Kornplatz, a la quala las festivitads han pudì vegnir a fin.

Uniun sindicala pretenda mesiras

A chaschun da la chauma da dunnas pretendan l'uniun sindicala dals patruns e da la politica mesiras per che la vaira egualitad vegnia finalmain realisada, perquai che quella n'è anc ditg betg cuntanschida, aveva ella scrit ordavant. Uschia gudognan dunnas tenor l'Uniun sindicala svizra (USS) en media mintga mais 1'364 francs pli pauc ch'ils umens. Las analisas da la paja entaifer ils manaschis hajan fatg naufragi, en professiuns ed en branschas cun ina gronda part da dunnas vegnian las lavurantas ed ils lavurants pajads vinavant mender e mintga segunda dunna haja mulestas sexualas a la plazza da lavur.

Or da l'archiv: Co ési vegnì a quest di da chauma?

Per la USS basti uss – ella pretenda plazzas da lavur segiras, respectusas per tuttas e per tuts, ina midada da curs sco er controllas liantas, multas ed obligaziuns legalas per eliminar las inegualitads da paja constatadas e la toleranza nulla en cas da mulestas sexualas.

Revalitar las professiuns da dunnas

Las branschas e las professiuns cun ina gronda part da dunnas sajan pertutgadas savens da salaris bass. Passa la mesadad da las dunnas cun ina activitad professiunala gudognan damain che 4'200 francs il mais. In quart schizunt sut 2'500 francs. Era cun in emprendissadi terminà restia la paja da bleras dunnas sut 5'000 francs. La Uniun sindicala svizra pretenda perquai salaris d'almain 4'500 francs – e 5'000 francs cun emprendissadi. Vinavant pretenda la USS ina augmentaziun structurala en las professiuns da dunnas classicas.

Plinavant pretenda l'uniun che programs d'egualitad na dastgian betg vegnir stritgads sin squitsch da la dretga. Uschia haja il president american Donald Trump decretà en ses emprima emna en uffizi ina retscha d'ordinaziuns che sa drizzian cunter programs per varietad, egualitad ed integraziun en il sectur public e privat. L'effect da questa mesira politica saja stà che plirs concerns farmaceutics sco Roche e Novartis, ma era la banca gronda UBS hajan stritgà lur finamiras da diversitad da promover minoritads e dunnas en posiziuns da cader.

La USS sustegna ultra da quai l'iniziativa da canortas, che vegn probablamain en votaziun l'onn proxim. L'iniziativa contribueschia en moda decisiva a reducir dischavantatgs structurals e promovia l'egualitad effectiva da la vita professiunala.