Sch'ins ha gizzà las ureglias en la Chombra pitschna, han ins udì ina buccada rumantsch qua e là. Uschia ha il president Thomas Hefti (PLD) ditg che las linguas sajan la porta tar la cultura da las minoritads linguisticas. Per rumantsch.
Silsuenter ha la lavur dal mintgadi cumenzà las 8:30 en Chasa federala: Igl è vegnì discutà tge che saja da far en cas da crisa, sco per exempel durant la pandemia da Covid-19. Il president da la gruppa parlamentara «plurilinguitad CH» Hans Stöckli (PS) ha manegià: «L'epidemia da Covid-19 ha caracterisà tut las activitads da la legislatura da l'Assamblea federala». Quai ha el medemamain ditg per rumantsch.
Pli tard, durant discussiuns brisantas davart la regulaziun dal luf, ha Martin Schmid (PLD) pledà per la lescha da chatscha.
Reagì ha Mathias Zopfi (Verds), medemamain per rumantsch.
Preschientscha tar las autoritads gida a la lingua
La gievgia dals 29 da settember è stà quest onn il di da la plurilinguitad en il parlament. Parlamentarias e parlamentaris n'han dentant betg mo discurrì rumantsch, mabain er franzos e talian.
Il dis da la plurilinguitad en l'administraziun federala duain promover la plurilinguitad. Per surviver ston linguas restar relevantas. Quai stat er en il rapport dal Cussegl da l'Europa che pretenda dapli preschientscha da las linguas da minoritad en l'administraziun.
Dal tut na svanescha il rumantsch dentant betg en la Chasa federala - er suenter il di da plurilinguitad: En sia funcziun sco vicepresident dal Cussegl naziunal ha Martin Candinas (AdC) mintgamai surdà il pled a ses collegas per sursilvan e vegn pli probabel a far quai er en l'avegnir.
