La Partida socialdemocratica svizra ha confermà il presidi da Cédric Wermuth e Mattea Meyer. Sco vicepresidentas e vicepresidents èn vegnids reelegids Jon Pult, Samuel Bendhan, Roger Nordmann, Elisabeth Baume-Schneider, Jacqueline Badran, David Roth e Nicola Siegrist.
Er Alain Berset è da la partida
En vista dals pretschs che creschan en Svizra, admonescha il cusseglier federal, Alain Berset, da l’indifferenza en temps da crisa. Da lez temps dovria schliaziuns per tuttas e tuts en la societad. Ins stoppia far attent ch'ils povers na ston betg guardar anc pli fitg sin ils daners. El ha era discurrì davart las premias da cassas da malsauns che creschan. Concret ha el crititgà la «refusiun da refurma» en la politica.
Relaziun cun l'UE
La partida socialdemocratica vegn era ad approvar in palpiri da posiziun davart la politica europeica. Là vegn discutà l'entrada en l'UE en trais etappas.
In'entrada en l'UE ch'è bun tractada, n'è betg la suletta, ma la megliera opziun.
Dentant n'eran betg tuts da quella opiniun. Ins haja il mument auters problems sco clima, guerra e inflaziun, ha ditg in auter commember. In autra persuna discurriva che l'UE saja ina part dal problem e na betg la soluziun.
