Il prim di dad avrigl è adina in di da far beffas è d’empruvar da zuppar sgnoccas en il mintgadi. I dat bleras interpresas e persunas che na laschan betg mitschar la schanza da far in spass cun il public. Er quest onn devi numerus cas da sgnoccas, qua ina survista :
La Viafer retica per exempel ha annunzià ch’els porschan da nov «gender-reveal-parties» cun lur locomotivas. In skerz creativ che vegn sclerì cun smatgar sin il link che maina sin la pagina da la RhB.
Ina autra idea creativa è vegnida da l’Engiadina Bassa nua ch’il turissem Engadin Scuol Zernez ha publitgà las novitads ch'i vegnia bajegià ina lingia d’aua minerala directa da Scuol fin giu Turitg. Tenor quel post datti baud aua minerala da Scuol or dal tgiern a Turitg. Er qua: avrigl, avrigl!
In auter tema da discussiun hai dà er tar il turissem da l’Engiadina’Ota. Sin in post da social media han els preschentà ina nova sort da chips da Zweifel, aroma: turta engiadinaisa.
Er Mobility ha annunzià midaments. Els vulan uss lavurar ensemen cun Swiss Helicopter e porscher uschia helicopters per affittar. Bella sgnocca!
En connex cun il «Sechseläuten» quest onn cun il chantun Grischun sco chantun envidà ha il chantun Grischun communitgà sin social media ch’els planiseschan da crear in «Stei-Böögg» empè dal normal «Böögg». Guardain ina giada co quai vesa ora quel di.
Ad Uetendorf sper Thun haja ina cularia sviluppà ina uschenumnada «stgella da scutinar», quai communitgeschan la «Berner Zeitung» ed il «Bund». Ella tuna mo mez uschè dad aut sco zains da vatgas usitadas.
Insatge cuntravers ha publitgà la «Südostschweiz» online. Igl han pretais ch'il chantun da Grischun vul introducir il tempo 30 sin tut ils pass dal Grischun. Quai saja per proteger animals selvadis, spargnar CO₂ e per permetter ina experientscha alpina nunemblidaivla. Ina idea romantica, ma strusch realisabla.
