Da 19 francs fin a passa 825 francs per in simpel sgol da Genevra a Marrakesch – tut tenor la data dal sgol ed il termin da reservaziun. Quest svilup dals pretschs resta ina black box per consumentas e consuments.
Per dar in cuc en la black box ha RTS registrà durant trais mais las tariffas per il proxim onn che Easyjet ha mussà – la societad aviatica lunschor la pli impurtanta a l'eroport da Genevra. Millis sgols da var 15 lingias davent da Cointrin èn vegnids analisads per chapir l'algoritmus dals pretschs dinamics.
Mintga societad aviatica ha sia atgna strategia da pretschs e ses agens algoritmus. Ils resultats en quest artitgel pertutgan mo Easyjet davent da Genevra durant la perioda observada.
Il mardi
Cumenzain cun in dals tips ils pli derasads en l'internet. Per pajar pli pauc, stoppian ins reservar il bigliet in mardi.
Quai para plitost da constar, sch'ins guarda sin las datas rimnadas, ma l'effect resta marginal. Il cumenzament da l'emna paran ils pretschs levamain pli bass, surtut tranter glindesdi e mesemna, e la dumengia pli auts. La differenza è però propi minimala: damain ch'in franc per bigliet.
Cun auters pleds: reservar il mardi n'è nagin recept magic. Il di da l'emna, cura ch'ins cumpra, quinta pauc. Percunter dumbra il dumber da dis tranter cudeschar e sgol bler dapli.
Cura reservar? Ordavant!
Las datas na resultan betg en ina regla universala à la «reservai precis X dis avant la partenza». Ma in trend sa mussa cleramain: igl è meglier da reservar dus u trais mais ordavant e cunzunt d'evitar da spetgar ils ultims 30 fin 40 dis. A partir da questa perioda daventan ils pretschs cleramain pli auts e volatilas.
Dus u trais mais avant la partenza èn ils pretschs sin in nivel pli bass.
Last minute – ina nauscha strategia
Sche Vus manegiais ch'i dettia «last minute» ina reducziun marcanta dal pretsch, sche ristgais ina trumpada. Da quels bigliets datti bain en las datas, ma els restan l'excepziun.
La damaun dal sgol sez è la media dals augments e da las reducziuns en la medema dimensiun: var in pèr dunsainas francs dapli u damain ch'il pretsch inditgà il di avant. Ma ils augments èn bler pli frequents. Tranter il di avant ed il di da partenza s'augmentan passa 80% da las tariffas, entant che mo var 3 fin 4 % dals sgols cumparegliabels vegnan pli bunmartgà. Durant ils ultims dis è la dinamica fitg disfavuraivla per ils viagiaturs.
Oravant tut è il spetgar fin a l'ultim mument darar lucrativ cumpareglià cun ina cudeschaziun a temp. Dals sgols cumparegliabels paran mo 7,3% d'esser il di da partenza pli bunmartgads che 30 dis avant. La quota croda sin 3,6%, sch'ins cumpareglia il pretsch il da la partenza cun il pretsch observà dals dus mais avant.
Ina nova calibraziun duas emnas avant la partenza
Sche Vus n'avais betg pudì far quai ordavant, datti tuttina in'interessanta fanestra da temp duas emnas avant Voss viadi. Nossas datas mussan che exact 13 dis avant la partenza ha lieu ina nova calibraziun considerabla.
En 37% dals cas èn quai stadas reducziuns. Quai è cleramain il di che Vus avais statisticamain la pli gronda schanza ch'ils pretschs da bigliets sa sbassan.
Però: Il medem di s'augmentan er ils pretschs da 27% dals sgols. Tut en tut vegnan midads bunamain dus terzs dals pretschs observads.
Las datas mussan ch'il mecanissem che Easyjet ha installà valitescha da nov ils sgols en intervals regulars, mintga 7 dis. Il 13avel di avant la partenza è l'ultim grond punct, avant ch'il sgol cumenza ses augment final.
Sgular e turnar il dretg mument
In ulteriur factur è la tscherna dals dis da viadi. Pauc surprendent: en media èsi pli char da partir in venderdi u ina sonda. Turnar ina dumengia è anc pli char. Quests dis correspundan a las periodas las pli dumandadas per ina fin d'emna prolungada u per dimoras d'ina emna per raschuns professiunalas.
Viceversa èn viadis entamez l'emna pli bunmartgads. En nossas simulaziuns custa in sgol cun dimora da mesemna fin mesemna en media circa 30% pli pauc che da la dumengia fin la dumengia. Tut tenor la destinaziun sa mussa la differenza anc pli cler.
L'effect da la fin d'emna è spezialmain marcant tar dimoras da duas notgs. In sgol d'ir e da turnar da venderdi fin dumengia custa en media 50% dapli ch'ina dimora equivalenta da glindesdi fin mesemna. Ins sto dentant avair la flexibilitad da viagiar durant l'emna.
5% pli favuraivel cun midar la valuta tschernida
Nus avain era fatg tests cumplementars, nua che nus avain varià tscherts auters parameters: Navigar cun u senza activà cookies, differents browsers e colliaziuns via VPN da plirs pajais. Qua n'avain nus betg constatà ina differenza da pretsch che steva en connex cun quests parameters.
En noss tests ha in tschert element dentant sbassà ils custs: la valuta. Per sgols davent da Genevra eran las tariffas inditgadas circa 5% pli favuraivlas en francs svizzers che en euros. Quai per ils medems sgols tschertgads il medem mument.
Il medem fenomen sa mussa en l'autra direcziun en cas da tests ordaifer il perimeter da Genevra. Per in sgol davent da Paris è il pretsch en euros stà pli favuraivel che en francs svizzers. En noss tests è la valuta locala dal pajais da partenza damai stada la pli favuraivla.
Tut ils resultats da questa analisa èn valaivels per la perioda observada. Sco mintga concepziun dinamica dals pretschs pon els midar dad in di a l'auter, sche la societad aviatica mida ses algoritmus.