Pendular u far viadis durant il temp liber. Il traffic public è impurtant en la Svizra – nus essan schizunt campiuns europeics dad ir cun tren, cun en media passa 2'500 kilometers per persuna mintg'onn.
In nov tool da RTS, ensemen cun la Scol'auta per architectura, inschigniers e furmaziun da la cuntrada da Genevra (HEPIA), lascha experimentar e testar quant lunsch ch'ins vegn, dependent dal lieu da partenza.
En il tool pon ins per l'ina selecziunar ina staziun da tren, u era in lieu exact sin la carta – sch'i na dat en il lieu nagina staziun da tren.
Per l'autra pon ins era inditgar il temp exact da partenza. Questa indicaziun fa senn, sch'ins ha in lieu cun plitost paucas colliaziuns, p.ex. Mustér. Sch'il temp selecziunà automaticamain è lunsch davent da la partenza dal proxim tren u bus, alura quinta il sistem quest temp sco temp da spetga ed in na vegn betg uschè lunsch sco pussaivel.
