La dismessa separada da battarias n'è betg mo ina dumonda da la conscienza ecologica: Igl è er ina dumonda da la segirezza. Bittar ina battaria en la sadella da rument faussa po periclitar ils collavuraturs en il sectur da recicladi. Il ristg il pli temì è il fieu.
Nus avain stuì clamar ils pumpiers.
Quai conferma Filippo Pedroletti, il manader dals servetschs tecnics da la citad da Lugano al Quotidiano da RSI. «Avant in pèr mais ha in camiun da rument piglià fieu, e nus avain stuì clamar ils pumpiers per stizzar il fieu.»
In cas sumegliant hai dà a Moudon en il chantun Vad. In incendi dal 2023 aveva destruì il center da reciclar capslas da café. «Igl era precis ina battaria ch'è sa tschentada en il manizzader ed è explodida. Ella ha brischà l'entir implant», ha raquintà Roger Blesi, il directur da Thévenaz-Leduc SA.
Litium è il culpant
En tuts dus cas era il culpant ina battaria da ionas da litium fitg inflammablas. Per quest motiv datti ina collecziun separada speziala. En il recipient correspundent «vegnan las battarias da litium cuvridas cun ina stresa da vermiculit, quai per proteger cunter eventuals incendis», declera Pedroletti. Sch'i sa tracta da battarias da litium, battarias d'alcohol u da cigarettas electronicas – mintga rument vegn tractà en moda adequata. Perquai èsi impurtant da l'allontanar en il recipient previs.
Era pertutgant las assicuranzas èsi in problem.
Tuttina resta il problem. En Svizra vegnan cumpradas mintg'onn 165 milliuns battarias, e mo ina da tschintg sa tschenta en il rument restant. «Per nus è il problem da las battarias fitg impurtant», di Michele Vismara, directur administrativ da la Vismara & Co. SA, al Quotidiano. «Era pertutgant las assicuranzas èsi in problem: Las assicuranzas han adina in pau bregias da segirar in'activitad sco la nossa pervia dal privel d'incendis.»
Battarias zuppadas
Il problem principal èn objects pitschens cun battarias integradas: Savens emblidan ins ch'els cuntegnan quellas e per ils collavuraturs da la branscha èsi difficil d'als gudagnar enavos. In vair sfarlattim, sch'ins considerescha che 95% d'ina battaria è reciclabla.
