L'assistenza al suicidi tar persunas ch'èn ablas da giuditgar saja be da responsar sche quellas pateschian da sintoms u consequenzas insupportablas d'ina malsogna. A questa conclusiun vegn la Chombra dals medis svizzers, il pli aut organ da l'associaziun da las medias e dals medis. Quella ha approvà las directivas correspundentas ch'èn vegnidas surlavuradas.
Dus discurs en duas emnas necessari
Per in'assistenza al suicidi entras ils medis stoppia la grevezza da la suffrientscha vegnir cumprovada cun ina diagnosa correspundenta, ed autras opziuns stoppian er esser restadas senza success. Per far la segira che quest giavisch dal pazient saja bain ponderà e duraivel, stoppia il medi far dus discurs en distanza dad almain duas emnas. I dettia però excepziuns. En pli stoppia il giavisch dal pazient sin basa da sia preistorgia e dals discurs esser plausibel per il medi.
En las directivas saja però era scrit, che las pazientas ed ils pazients n'hajan nagin dretg sin il suicidi assistì, e che mintga medi u media po decider sez da far quella lavur u betg.
Nagina chapientscha tar organisaziuns d'assistenza al suicidi
Las organisaziuns d'assistenza al suicidi n'èn betg cuntentas cun las directivas. Ellas èn da l'opiniun ch'i vegnia pli grev uschia per las pazientas ed ils pazients. Surtut perquai ch'ils medis stoppian classificar la suffrientscha sco «gravanta». Quai limiteschia ils dretgs dals pazients. Be il pazient maioren possia tenor las organisaziuns decider sur la grevezza da sia suffrientscha. I saja era nunchapibel che persunas saunas vegnian exclusas. Uschia vegnian era persunas pli veglias exclusas.
