Gia la sonda avevi dà critica pervi dal grond dumber d'aspectaturs ed aspectaturas. Radund 12'000 fans han persequità il slalom gigant davent da l'arrivada, blers senza mascrina e senza distanza. Ils organisaturs han lura era stritgà l'undrientscha dals victurs la sonda saira.
La dumengia hajan ils organisaturs appellà en il bus tar la cursa ed en l'arrivada avant la cursa da purtar mascrinas, sco in aspectatur ha rapportà a l'agentura Keystone-SDA. Ils blers hajan era fatg quai.
Era public l'autra emna a Wengen
Er tar las cursas da l'autra emna a Wengen èn aspectaturas ed aspectaturs lubids. Sco il manader da fatschenta da las cursas a Wengen, Andreas Mühlheim, ha ditg, cusseglian els urgentamain al publicum da purtar mascrina e da tegnair distanza. Sco gia ad Adelboden vala era a Wengen la regla da 3G per la zona da l'arrivada e 2G endadens. I na dettia dentant nagina tribuna mabain mo ina tenda.