Siglir tar il cuntegn

Header

cuntegn

Directuras da sanadad vulan Obligatori da mussar carta d'identitad en bars e clubs

Ils directurs da sanadad cusseglian als chantuns dad introducir l'obligatori da mussar la carta d'identitad en bars e clubs. Uschia veglian ins garantir che las chadainas d'infecziun possian vegnir persequitadas enavos.

Ils ultims dis hajan ins vis ch'ils concepts da protecziun da hajan per gronda part mancos, quai scriva la Conferenza da las directuras e directurs da sanadad chantunals. Cun mussar la carta d'identitad possian ins garantir ch'ins haja las indicaziuns correctas dals visitaders e da las visitadras.

134 infecziuns novas entaifer in di

En Svizra ed il Principadi da Liechtenstein datti 134 novas infecziuns dal coronavirus aifer in di. Quai èn 18 dapli ch'il di avant, sco l'Uffizi federal da la sanadad BAG communitgescha. Gia l’emna passada è il dumber da novas infecziuns creschì da di a di. Lura ha il BAG survegnì la conferma da 325 cas da novas infecziuns. L’emna avant eran quai anc 200 cas damain.

Dapli davart il svilup da las cifras.

Chantuns cun reglas pli severas

Abstrahà da quella cussegliaziun ha il Tessin scumandà per immediat fullas cun passa 30 persunas. Plinavant dastgan locals da sortida mo servir 100 persunas per saira en il Tessin. En il rest da la Svizra è la limita tar 300.

Er ils chantuns Giura e Vad han introducì reglas pli severas a partir da l'emna proxima. Els han decis ch'i vala a partir da glindesdi respectiv mesemna in obligatori da mascras en tuttas stizuns. En la citad da Turitg valan per ils bogns averts reglas pli rigurusas, cunzunt là nua ch'igl è grev da resguardar la regla da distanza.

Artitgels legids il pli savens

Scrollar a sanestra Scrollar a dretga